近期周圍都係「戰場」，前幾日唔同地區都出現暴力流血衝突，廣男雖然自己未有身處「戰場」，但身邊總有朋友住喺附近；前兩日廣男同一個住喺新界某區嘅朋友傾計，呢位朋友向廣男大吐苦水，話佢住嘅地方大廈入口密碼俾啲別有用心嘅人公開晒，搞到成條邨好似變咗「示威者基地」咁。廣男覺得有關做法極有問題，將大廈密碼公開，咁啲居民住嘅地方咪變咗「無掩雞籠」？萬一發生咩事，係咪有人應該負責先？

屋邨密碼俾公開 放上網

事緣係咁嘅，廣男呢位朋友其實一早喺網上面見到有人將屋邨各座嘅入口密碼公開，到咗8月5日有衝突當日，除咗邨內邨外成為「示威者基地」之外，自己住果座見到啲男男女女，都分唔清楚到底係真住客，定係外來嘅示威者；呢位朋友嘅家人，包括小朋友，結果就成日都唔敢出街，有家人落街買嘢食都中催淚彈，要去到夜晚局面稍為平靜番啲，家人先敢行出街，但出到去依然「戰戰兢兢」，因為衝突隨時都會再爆發，分分鐘殃及池魚。

廣男就覺得，有個別人士同情示威者甚至暴徒，呢啲係個人問題，點解要將屋邨、屋苑或者大廈密碼公諸於世呢？同情示威者嘅人士，可以代表到整座大廈嘅人，去為示威者提供「掩護」咩？更重要嘅問題係，如果大廈變成自由進出，有邊個可以擔保唔會發生啲咩衝突，或者不法之徒乘機犯案呢？其他住客嘅生命安全，咪好易受到影響？凡此種種，廣男認為將人哋屋企大廈密碼公開嘅做法，絕不可接受！

不要再將「戰場」擴闊！

大家近月可以見到，一班示威者、暴徒嘅「戰線」越拉越闊，開頭係政總、立法會，之後係警總、唔同嘅政府部門，再發展落去就係唔同地區嘅差館；發展到近幾日，連紀律部隊宿舍甚至一般平民百姓家都牽涉入內。咁搞法，係咪要全港十八區都變成戰場先？再咁樣「抗爭」落去，唔好話對社會，對自己都無好處啦！如果對香港有「愛」，根本就唔應該破壞自己嘅地方，更加唔應該將無辜嘅人拖落水！