反政府行動全面升級，個別激進示威者甚至暴徒除針對警隊、警署外，更將「攻擊」範圍擴至紀律部隊宿舍，將宿舍破壞得滿目瘡痍，有媒體走訪黃大仙紀律部隊宿舍，其裡裡外外一片混亂，被破壞痕跡隨處可見；香港警察社交平台更發布咗一條短片，其中一男戶主一家人包括老人家、女士、小童均因為暴亂而受驚，女孩更哭訴「點解我屋企會俾人打爛？」，睇到呢啲場面，囍雨想問一句，你哋嘅目標唔係政府咩？就算想針對警方，係咪要連紀律部隊宿舍都唔放過，小朋友都唔放過？暴徒以「正義」之名行惡，極度可惡！

小孩驚醒 無奈哭訴

根據警方社交媒體嘅短片，有受襲單位嘅窗戶支離破碎，屋內滿布碎片，一個男戶主受訪時話宿舍俾人掟蛋、掟磚，雖然已經盡量安撫屋企幾個女人，但年幼小童驚到大聲痛哭，只好暫時到較高層嘅同事屋企暫避；當日男戶主嘅女兒徹夜難眠，瞓緊覺都俾啲叫囂聲嚇醒，仲喊起上嚟問「點解會變成咁」、「點解我屋企會俾人打爛」，又同男戶主講「爸爸，我唔想再返屋企」。睇到呢度，大家有咩感覺？

講真，示威、集會演變成暴力事件，本身已經大有問題，依家一班示威者甚或暴徒將「戰線」拉闊到紀律部隊宿舍，囍雨敢問一句，入面啲紀律部隊家屬，包括老人家、婦人、小孩，同示威者有咩仇？點解要向佢哋屋企掟磚？呢啲就係佢哋所講嘅「禍必及妻兒」？當一班以「正義之師」自居嘅示威者、暴徒，不斷周圍作惡，甚至連細路仔都唔放過，唔好同社會講你哋有幾偉大、無私，因為你哋嘅行為，令香港人感到不齒！

應要譴責 與暴力切割

見到呢啲暴行，大家或者有一個疑惑，就係點解一班暴徒個膽會越嚟越大，掟磚、擲氣油彈、縱火、燒車乜都敢，囍雨認為答案相當簡單，咁係因為佢哋「相信」好多市民支持佢哋；喺呢個「前提」底下，如果大家唔想再見到呢啲暴力、欺凌事件發生，最好嘅應對方法，就係大家要發聲，表明反對、譴責呢啲暴力行為；尤其係當一班暴徒連無辜人士、小孩都傷害到嘅時候，大家更加要出聲，堅定向暴力說「不」！

原圖：香港警察社交網站影片截圖