噚日浸大學生會會長方仲賢喺深水埗買所謂嘅「觀星筆」，俾休班警截查，以佢身上面搵到十支「雷射槍」、以懷疑管有攻擊性武器罪名拘捕佢，事件引發示威者包圍深水埗警署，《生果報》報道就指「現場包圍警員聲討，質疑警方濫捕」；究竟所謂「觀星筆」、「雷射槍」或者「激光筆」，係咪攻擊性武器呢？不如等囍雨同大家重溫下《生果報》嘅一篇頭版報道，睇下《生果報》點講啦！

Fact Check《生果報》

為免產生誤會，囍雨決定原文照錄《生果報》喺2015年5月16日題為〈高危激光筆 1秒射盲眼〉嘅頭版報道：

「高殺傷力激光筆登陸香港！《蘋果》發現近日有人在深水埗鴨寮街及facebook（fb）兜售功率高達5,000毫瓦、足以射盲眼的激光筆，最低550元便有交易。記者買來兩支激光筆交專家測試，發現威力嚇人，激光溫度高達167℃，輕易燒穿7層黑卡紙及2毫米膠板，連魚眼及連皮五花腩肉亦輕易烤熟燒燶。眼科醫生警告，若被這類強功率激光筆直射眼睛，一秒可致盲。」

有學生被照射後送院

換句話講，如果係功率高嘅「激光筆」，如果直射眼睛，一秒可致盲，囍雨仲喺網上面搵到其他報道，就係幾年前有中學生攞教師嘅「雷射筆」玩，點知射到一位同學，令佢感到刺痛難當，眼水不斷滲出，要送院接受治療，有眼科醫生就指出，如果近距離或直望強烈嘅激光超過十秒或以上，就會對眼球構成影響，甚至可能會致盲。

一個大學生無端端買十支「激光筆」，係咪攞嚟睇星，囍雨就不評論，相信大家識得判斷；但對於「激光筆」或者「雷射槍」係咪武器，的確值得思考，尤其係當「激光筆」隨時可以射盲人嘅時候，呢個問題就更加要深思。話時話，喺近日嘅示威當中，經常見到示威者出動「激光筆」射警署甚至警員，呢啲又係咪「觀星」活動呢？ 

原圖:網上圖片