近日香港立立亂，一班激進示威者行動不斷升級，發展到噚日，甚至去到多間警署縱火，萬一發生人命傷亡，涉事暴徒分分鐘要背上「殺人放火」嘅罪名；講真，正常人見到依家嘅暴力衝突，都應該知道各方人馬應該收手，停一停、諗一諗，但偏偏一啲別有用心嘅人，依然繼續鼓吹抗爭，甚至講到「革命」有理咁款，其中一個，就係出咗名反中亂港嘅《生果報》評論員李怡，今日佢有篇文講到「革命」唔一定流血云云，睇到廣男眼都凸埋。廣男真係想問一句，李怡所講嘅「革命」，到底具體內容係咩呢？係咪先要好似佢「老闆」黎智英話為美國而戰，仲估計香港要重演六四事件？

關於「革命」的歪理

今日李怡喺《生果報》有一篇題為〈光復香港 時代革命〉，內容除咗一貫地反政府之外，廣男特別留意到佢提到「光復香港，時代革命」；作為《生果報》寫手，李怡當然有佢一套詮釋「革命」嘅手法，例如佢講到「時代革命」嘅時候，就話「革命的定義就是尋求根本性的改變。革命不一定是改朝換代，不一定是暴力與流血」，例如工業革命、技術革命，仲話香港嘅「時代革命」係要將中央「徹底破壞了的一國兩制、港人治港作根本性的改變」。睇到呢度，大家諗到啲咩？

當李怡為喺度同大家講解「革命」，甚至話「辛亥革命」實際上暴力同流血都「不多」嘅時候，好似話俾人聽「革命」唔一定流血，或者唔駛流「好多血」咁；但廣男質疑，依家每次集會、示威同堵路，幾乎都出現流血事件，李怡要流血要咩程度，先覺得係流血多呢？係咪要去到戰爭程度，以萬計人受傷甚至死亡，佢先覺得「啲血算係多」喇？當每次示威、集會都流血，而李怡仲喺度講呢啲嘢，實在係涼薄！

李怡想造反？

至於李怡稱「香港的『時代革命』，就是要把被中共港共徹底破壞了的一國兩制、港人治港作根本性的改變」，廣男覺得仲奇怪，先不論佢詆譭「一國兩制」，佢話「時代革命」係要作出「根本性改變」，係咩意思？係要所謂嘅「雙真普選」，定有其他意思？所謂嘅「根本性改變」，唔係想講「港獨」呀？李怡講啲唔講啲，好難令人唔覺得佢係支持造反囉！

曾發表「報應」、「自作孽」同「天譴」論，對中國人離世「幸災樂禍」嘅李怡，佢有幾「反中」大家都知道，但廣男必須指出，依家咁多年輕人出嚟抗爭、受傷、被捕、被告，好心李怡就唔好再鼓動啲人啦。一句到尾，佢係咪想有更多流血事件出現先？