噚日反政府人士搞咗個所謂「三罷」行動，結果原來係有人堵塞港鐵、道路等等，搞到天怒人怨，甚至有市民喺港鐵不斷直斥示威者係「暴徒」；對於一連串嘅阻塞行動，盲反派似乎「引以為傲」，職工盟主席吳敏兒今日出席電台節目，就估計有35萬人參與，仲認為數字有「鼓勵」作用。囍雨先唔講35萬呢個數字係咪真，相對起全港有超過380萬就業人口，30幾萬連十分之一都唔到，有九成人依然默默耕耘，做好本分；再者，當有人為咗打垮政府，認為就算打爛經濟都在所不惜嘅時候，囍雨必須指出，政府、官方公布嘅只係數字，到市民尤其係基層生計受影響，係講緊市民有冇飯食、有冇錢供樓交租、有冇錢幫仔女交學費雜費，好心啲人唔好因為要反政府，就搵埋其他香港人「陪葬」啦！

香港人的擔子

如果吳敏兒嘅估算係正確，即係全港超過九成人無罷工，點解？囍雨當然唔會覺得香港人「好鍾意返工」啦，但事實係香港人，好多都好重負擔，投身咗社會工作嘅，如果未結婚，好多都要儲錢、俾家用、自己開支以至租屋；結咗婚甚至有埋小朋友嘅，擔子仲重，自己使費、俾家用、家庭開支、供書教學，依家樓價、租金咁貴，就算係中產好多都吃不消。當啲參與示威嘅後生仔話自己要故意令到經濟變差，令政府收入有損失等等，令政府管治成本增加，從而聽從佢哋嘅訴求，囍雨必須講句，呢啲成本唔單止係政府要負，其他香港市民，一樣走唔甩。

只要大家留意下近日嘅財經新聞，零售指數疲弱、股市疲弱，甚至連好難無增長嘅GDP（本地生產總值）都可能喺第三季出現負增長，咁代表咩？代表唔同行業包括出口、零售、餐飲等都出問題，除咗相關行業嘅人士生計會受影響，喺連鎖效應下，其他行業例如服務業、銀行業一樣有負面影響；萬一出現減薪、裁員潮，啲年輕示威者覺得對自己無乜影響，不過如果佢哋嘅父母、供養人經濟出問題，佢哋仲可以獨善其身？

金融風暴的教訓

可能依家啲年輕人太後生，無真正經歷過經濟差對香港市民有幾大影響，當年金融風暴、SARS，有啲香港人因為樓價急跌變成負資產，當中有啲工作又出問題，無錢繼續供樓，如果賣樓就要補差價，一生積蓄化為烏有，更欠下巨債，結果有人選擇燒炭自殺；所以，經濟出問題，唔係數字問題咁簡單，而係一個又一個家庭出問題，可以勉強維生或者重頭嚟過嘅尚算好彩，家破人亡果啲，唔通仲可以覺得只係「經濟數字」出問題咩？如果香港今日因為示威者一連串行動而打爛咗香港經濟，要付出代價嘅肯定係無數嘅香港市民！

「無差別」使用暴力

年輕人有理想，大家都唔反對，但如果年輕人追尋理想嘅代價，係要其他香港人一齊埋單，甚至其他市民嘅生計嚴重受到打擊，進而令家庭出問題，呢啲真係班年輕想見到嘅？仲有一點，就係有班暴徒近日喺示威區，對住啲意見不同人士，基本上係「無差別」使用暴力，隨處都有暴力打鬥事件；當外人認為香港唔再係安全城市，少咗人肯嚟香港旅遊、投資，一班香港年輕人仲覺得「事不關己」嘅話，實在太天真喇！ 

原圖：文匯報