今日有反修例人士發起所謂「三罷」行動，包括罷工、罷市同罷課，並要喺七區舉行集會，囍雨心諗，你哋反政府，你哋選擇要「三罷」，其他香港市民無說話好講，但原來佢哋嘅「三罷」行動，唔止係自己唔返工、唔返學咁簡單，而係佢哋連其他香港市民返工都唔俾，有人阻住港鐵行駛，有人堵路，甚至有人喺交通交匯處玩「慢駛」。呢班反修例人士，原來唔係罷工，係惡到其他人返工都唔俾，敢問一句，佢哋有咩權利咁做，連其他人嘅自由都要剝奪呢？

孕婦不適送院

囍雨喺度必須講句，呢班反修例人士阻到嘅，除咗係上班一族，係連老人家甚至大肚婆都阻到，喺港島果邊，就有地鐵站因為俾班示威者阻住開唔到車，成個月台又多人又嘈，有大肚婆因而身體不適，佢老公直頭鬧班示威者，問佢哋究竟做緊啲咩，搞到香港咁；喺其他港鐵站，直頭有乘客一齊不斷高叫「暴徒！暴徒！暴徒！」，呢班人有幾討厭，相信有唔少今朝出門受阻嘅人都會感受到。

老實講，當一班人話要罷工，Okay，呢啲係你哋嘅自由，你公司點處理其他人理唔到，但問題係一班自己要罷工嘅人，竟然用埋啲極度討厭嘅手段，阻礙鐵路、堵塞道路，令到其他想返工嘅人都返唔到工，或者大受影響；最最離譜嘅係，呢班人似乎連大肚婆都唔放過，囍雨想問下，如果呢個大肚婆最後有咩事，佢哋對唔對住自己良心？又或者，如果有其他要出門、睇醫生嘅老人家受到影響，呢個又係咪佢哋「罷工」嘅初心呢？

「三罷」行動 失敗告終

的而且確，香港係一個自由社會，但囍雨希望大家明白，自由唔係一個放任甚至恣意妄為嘅概念，市民或者示威者行使自由權利，唔代表佢哋有妨礙他人嘅自由，甚至係將其他人「禁錮」喺一個地方或者交通工具上。喺往後日子，香港唔同地方、道路或者公共交通工具上，仲極有可能出現今日嘅情況，囍雨請警方嚴正執法，如果有人涉嫌犯法，就一定要嚴肅跟進、調查甚至拉人，如果因為班示威者「人多」就唔做嘢，囍雨恐怕香港呢個「動感之都」，會俾班示威者變成係「動亂之都」，到時香港市民真係多得班示威者「唔少」！ 最後一點，今日啲人罷工、堵路，引嚟極多市民反彈，而且仲有好多人依然返工，證明佢哋嘅「三罷」行動根本係失敗嘅；佢哋依家周圍破壞，係咪想轉移視線，等人唔覺佢哋嘅「三罷」行動失敗收場呢？

原圖:RTHK