警方噚日喺火炭搗破「武器庫」、拘捕8人（包括港獨分子陳浩天），事件引起全城關注。但除咗呢單嘢，其實噚日喺沙田、馬鞍山一帶，仲發生咗兩單令人憤慨嘅件事。一單係喺傍晚時分，一批口罩黨又去到沙田新城市廣場大搞所謂「接放工」行動，實質就係滋擾商店、市民；另一單就發生喺警方拘捕陳浩天等人之後，一大批示威者先後圍堵沙田及馬鞍山警署，一邊叫囂「放人」，一邊就大肆破壞警署設施。廣男實在要講一句，呢班人實在係無法無天！一邊就騷擾市民、一邊就攻擊警察，依家香港係咪「示威者」惡晒、可以橫行無忌呢？

講番沙田新城市廣場件事，班示威者聲稱係為咗「宣傳」下個星期嘅罷工、罷市同埋「聲援」今晚嘅公務員集會。表面上佢哋好似係為咗政治宣示，但實質就根本係阻人消費、做生意，而且擺明針對一啲內地品牌；遇到有市民斥責，呢班滋事者就咆哮而上，一於「有我講冇你講」、達至「滅聲」效果。而警方喺火炭進行拘捕行動之後，一班示威者去圍警署就更過分。佢哋先喺沙田警署綁鐵閘、破壞閉路電視、用激光射警員「要求放人」，之後得知陳浩天等人喺馬鞍山警署，呢批示威者就轉戰馬鞍山佔據馬路、又有人撬起警署鐵閘企圖破門而入，最終要防暴警察出動控制場面。

四處破壞 想點就點？

一日裡面發生咁多事，實在令廣男覺得香港近期嘅一連串所謂示威行動，已經完全變咗質，發展到今時今日，就好似已經係任由一班以「示威」為名嘅激進分子為所欲為。依家香港嘅「新常態」似乎係每逢星期六、日，就有班人以各種名義、喺全港各區輪流搞集會、遊行，繼而製造警民衝突；而平日「一至五」，呢班人又好似打游擊咁四處生事、破壞社會秩序、社區安寧。大家諗下，當呢班人下下有「訴求」已經發展到夠膽圍警署、打警察「要求放人」，廣男覺得，其實佢哋嘅內心嘅潛台詞就係「我大晒」「想點就點」。

罔顧法紀 必有後果！

所以廣大市民真係要諗下，依家呢種「新常態」，香港仲可以承受幾耐呢？係咪仲要俾呢班人繼續橫行落去呢？廣男亦都請班示威者搞清楚，你哋有「訴求」係一回事，但圍警署、攻擊差人就係令一回事。依家警察拉人有證有據，既係依法辦事、亦係維護法紀，豈會由得你哋話拉就拉、要放就放。廣男喺度要再次奉勸班示威者一句，唔好再做一啲過分、唔合理、有損法治嘅行為，更加唔好以為四處破壞、犯法之後仲可以冇後果！

原圖：Facebook