《逃犯條例》風波久久未降溫，風暴甚至已經捲入校園，相繼有大學校長被逼表態；噚日中大校長段崇智同學生對話，表示對於學生受傷、情緒受困擾感到痛心，但就俾學生質疑佢做「錄音機」、「垃圾」、叫佢「講人話」，之後仲將佢部車變成「連儂牆」，貼滿發洩字句。囍雨綜觀噚日嘅對話，其實段崇智已經承諾喺方方面面支援學生，甚至如果學生被定罪、入獄，都會盡力保留學生學位；老實講，一班學生涉嫌犯法，大學校長無割席仲打算支援佢哋，大家仲想點？

全程質詢 並非對話

如果你問囍雨，囍雨真係唔係好覺得噚日嘅「對話」係一場討論，根本完全係一場校長「俾人質」嘅宣洩活動。事實上，段崇智喺「對話」時，表示會對被捕學生提供法律支援，為同學提供經濟、住宿及情緒支援，甚至連「無錢食飯」嘅問題都照顧；退一步講，如果有學生被定罪、要坐監，段崇智亦承諾會盡最大努力保留入獄學生嘅學位，俗啲講句，段崇智算係仁至義盡啦，啲學生係咪要校長支持佢哋嘅暴力抗爭行為，要同佢哋「同一陣線」，先至可以叫做「一家人」呢？

事實上，作為大學校長，段崇智根本不可能聲援班學生，尤其係有學生所作行為涉嫌違法。作為一個教育工作者，除咗要向學生傳授知識之外，更要教學生點樣做人，如果一個教育工作者支持學生用違法激進行為解決問題，咁仲成世界嘅？好似港大校長張翔咁，無論係7.1衝擊立法會事件後，抑或係7.21中上環暴力衝突後，基本上都貫徹佢反暴力嘅原則，無因為學生施壓而放棄原則，呢啲就係教育工作者應有嘅風骨。

與其驚 就唔好犯法

另一個問題，就算同校長意見不同，點解出言侮辱？又要當校長部車好似「連儂牆」咁貼呢？呢啲就係學生對校長嘅「應有之道」？呢啲算唔算係刑事毁壞？最後囍雨想講，依家唔同大學嘅學生似乎對被捕、被定罪等相當恐懼，囍雨又係果句，如果驚俾人拉、驚要坐監、驚前程盡毁，最好嘅方法就係唔好犯法！今日有學生因為暴動、違法而被定罪，佢哋本人前途一定會受到影響，得益嘅只有抽政治水嘅政客。凡事三思而後行，千祈唔好做令自己後悔、家人傷心嘅違法事情！ 

原圖：Takungpao