警方日前宣布準備起訴「7·28」港島衝突期間嘅被捕示威者、並控以「暴動罪」之後，引起強烈反彈，由於部分疑犯被扣留喺葵涌警署，前晚就有千名戴口罩嘅示威者發難、包圍葵涌警署叫囂「放人」，甚至一度想衝入警署。危機之間，有警察一度舉布袋彈槍控制場面。廣男相信，事後必定又會有人攞「警察舉槍」大造不盡不實嘅文章，意欲指控警察「威嚇、傷害」示威者。但大家必須搞清楚一個事實，就係有人襲警在先，而且現場情況面臨失控，在此情況下，警察舉槍既係無奈，亦係必须。

廣男覺得，大家首先有必要搞清楚當時現場發生緊咩事。根據傳媒報道，一大批人前晚全副武裝包圍葵涌警署、除咗要求「放人」，更一度企圖衝入警署；之後雖有數十警員衝出警署打算驅散暴力分子，但就反被圍攻、追打，有人掟鐵枝、雜物襲警，更有人向警察擲鏹水彈，導致至少5名警員灼傷。在此瀕臨失控嘅場面之下，一名警署警長先至取出裝有布袋彈的長槍指向暴徒。其實前晚除咗係葵涌出現危險場面，差唔多同一時間天水圍都有好多人圍差館，仲有人用煙花射傷人。

顛倒是非的指摘

所以當網絡以至社會上出現一啲顛倒是非嘅聲音，質疑警方對示威者「濫用武力」嘅時候，大家必須要睇清楚，個事實係有人惡意襲警在先，警方迫於無奈之下使用最低限度嘅武力，既係為咗保障自己個工作安全，更加係保障緊在場其他市民嘅安全。就以葵涌警署噚晚嘅情形嚟睇，部分激進分子已經出動鏹水彈、鐵枝，而且圍攻警察，甚至一度有人要衝入警署，試想下，如果當時情況失控，隨時造成流血事件，甚至「搶犯」都有可能，發展落去，後果不堪設想。警察喺呢個時候出手，正正係以專業手法履行職責。

圍警署、打警察都合理？

講到呢度，廣男覺得大家都應該反思一個問題，就係當一班示威者，包括一啲政客一次又一次指摘警方如何「不合理」、「不專業」同「濫用警權」時，好似調番轉頭又講到依家圍警署、打警察都好似好合理咁款；似乎圍警署就美其名曰「抗爭」，打警察就係「義士」，大家回想一下，之前班示威者兩度包圍警察總部，已經聞所未聞，之後又有示威者咬斷警察手指，但受到責罵嘅依然係警察，反而對施暴者施以同情，咁嘅社會係咪已經病入膏肓呢？我哋珍而重之嘅香港唔應該係咁！

原圖：文匯報