之前某中學通識科老師賴得鐘發表仇警言論，引起社會極大反彈，雖然賴之後致歉並辭去有關通識科嘅公職，但依然被各界狠批；最近，另一學校助理校長戴健暉喺網上發表仇警言論，詛咒警員七歲以下嘅小朋友「過唔到七歲」等，言論極度涼薄冷血，人神共憤。對於呢啲無人性嘅言論，竟然仲有人幫佢哋辯駁，話社會要「崩壞」到咩程度，先令平時「斯文得體」嘅老師情緒波動到去咒罵警察；言下之意，係咪即係情緒波動可以合理化不當言論呢？呢種邏輯，廣男實在諗唔通！

仇警、詛咒言論嚇人

話說真道書院助理校長戴健暉日前喺社交媒體發表詛咒警員嘅言論，話要祝福啲用過暴力嘅警員，如果有七歲以下嘅小朋友，佢哋就「過唔到七歲」；如果七歲或以上，就20歲前「死於非命」，因為想佢哋（警察）同下一代有番啲感情，等啲小朋友過身嘅時候，呢班「打過青年」嘅父母就有同樣嘅切膚之痛。戴健暉仲揚言，可以話佢惡毒，但批評係警察「did it first」（犯錯在先）。睇到呢啲言論，大家有咩睇法？廣男只能夠講，講得出呢番說話，根本就係人性泯滅。

就當戴健暉唔鍾意警察，尤其係執法時使用過武力嘅警察，咁就要詛咒警察？甚至連佢哋啲子女都唔放過？更恐怖嘅係，依家戴健暉係咒人「過唔到七歲」、20歲前「死於非命」，引用某啲人嘅講法，呢啲係人話嚟嘅咩？面對呢啲惡毒言論，正常人都會批評，但廣男上網，竟然仲見到有人為佢哋辯駁，甚至稱係社會「崩壞」令人情緒波動；老實講，如果可以用「情緒波動」去合理化不當言行，咁社會以後仲駛唔駛講是非黑白、對與錯先？仲有一個問題，如果講情緒，身為執法者嘅警察一樣有情緒，但社會又有幾多人係關心警察嘅處境、情緒，而唔係一味攻擊佢哋呢？

校方不能包庇戴健暉

對於戴健暉散播惡毒仇警言論，校方有決定點處理佢嘅權利，廣男覺得校方如果唔處理呢啲泯滅人性嘅教職員，可以預計得到，呢啲教職員可能會將仇恨言論散播落去，為禍教育界，為禍他人子女。所以，廣男喺度請校方有關管理層必須嚴肅處理事件，用行動向言語暴力及黑毒心腸說不！ 

原圖:大公報