有關《逃犯條例》風波至今仍未平息，少部分激進示威者近期更不斷將行動升級，可以話係已經影響到香港嘅繁榮穩定，甚至觸及「一國兩制」底線。今日國務院港澳辦記者會，其發言人批評極少數激進暴力分子，罔顧國家根本利益、罔顧香港根本利益、肆意妄為衝擊社會秩序，中央政府堅決支持香港警方嚴正執法，包括依法懲治暴力犯罪分子，並對警方堅守崗位、恪盡職守、無懼無畏、忍辱負重的優良表現，表示由衷敬意。囍雨理解，港澳辦呢番說話，既對政府表達支持，更加係對警隊執法嘅一支強心針；香港警察唔需要對暴力分子有所懼怕，唯一要做嘅事，就係嚴正執法，見一個拉一個！

港澳辦：嚴懲暴力分子

港澳辦發言人指出，法治係香港人引以為傲嘅核心價值，係香港保持繁榮穩定嘅重要基石，每個人都有表達意願嘅權利，但任何人都無違法嘅自由，中央政府同香港各界人士，唔會坐視一部分人肆無忌憚地踐踏香港法治；值得留意嘅，係港澳辦希望廣大市民睇清楚啲喺背後慫恿、支持暴力分子嘅香港同外部「反中亂港」嘅勢力，一齊反對同抵制佢哋亂港禍港。

囍雨覺得，港澳辦發言人嘅一番說話，除咗一貫表達對港府嘅支持外，最值得留意嘅就係港澳辦特別表示支持香港警察嚴正執法，以及相關部門、司法機構依法盡快懲治暴力分子。換句話說，警察依法辦事，拘捕、檢控近期破壞社會秩序、甚至使用暴力嘅激進分子，乃義之所在，得到國家全力支持。

暴徒最怕坐監

綜觀近日嘅暴行，警察好少大規模拘捕破壞、暴力分子，囍雨覺得要起到震懾作用，其實警察難免要盡力將涉事分子拘捕歸案；否則，啲示威者「覺得」衝完無代價，下次有示威，當然又會出嚟「衝」過，甚至會覺得自己好威風。所以，警察喺防守及發放催淚彈驅散示威者之餘，應該盡力執法，包括拘捕違法暴力分子，令到其他暴力分子知道犯法「有代價」，衝突現場亦非「來去自如」！講白啲，呢班暴力分子平日喺網上留言就「天不怕地不怕」，但一提到被捕、起訴、入獄，即時腳軟！

如果大家有印象，應該仲記得囍雨之前寫過反修例嘅一班所謂「義士」，絕非無所畏懼，有啲喺7.1衝擊完立法會，無幾耐就「逃亡」咗去台灣；如果警方加強執法，恐怕佢哋如果「繼續衝」，唯一下場就係等俾人拉、俾人告。喺呢度，囍雨要再次呼籲一班示威者，如果怕俾人拉、俾人告，最好嘅方法，就係唔好犯法！以為戴咗口罩就無事？唔好咁天真啦！

原圖：文匯報