喺剛過去嘅周六同周日，元朗同港島都有示威者喺無「不反對通知書」嘅情況下，喺上述地方遊行、衝擊甚至襲警；一班示威者喺無批准嘅情況下遊行，本來都係意料中事，最令廣男覺得驚訝嘅係，明明一班示威者極可能已經犯咗法，點解仲會有一班盲反派議員同佢哋「同行」，甚至企喺佢哋前面「擋住」正在執法嘅警察呢？係咪立法會議員就唔駛守法，仲可以阻住警察做嘢，然後一句自己係嚟「監察」就無事？

與暴徒「同行」？

廣男先講講元朗嘅非法遊行，盲反派政客有好多都「出席」咗呢個行動，包括身為新界西立法會議員嘅朱凱廸、鄺俊宇、尹兆堅同鄭松泰，其他立法會議員則有許智峯、譚文豪、楊岳橋、林卓廷等人，至於政客則包括黃之鋒、何俊仁、李永達等等，甚至連《生果報》老闆黎智英都有到過元朗。值得留意嘅係，鄺俊宇除咗幫班示威者「擋」，學胡志偉大叫要見警察指揮官外，佢仲俾人影到佢喺路邊同全副武裝、攞住利器嘅暴徒「言談甚歡」，佢係咪有份策劃、參與今次行動，廣男覺得真係有需要查清查楚。

至於中上環一帶嘅衝擊行動，盲反派立法會議員許智峯、區諾軒、郭家麒同張超雄都有喺現場，其中許智峯仲攞住大聲公滋擾警方。綜觀果兩日嘅示威、遊行，包括元朗嘅集結，以及中上環集會變「非法遊行」，其實嚴格嚟講都係非法嘅，一班示威者有心想搞事，大家都預計到，但啲盲反派議員，明知有人涉嫌違法，仲要有部分可能犯下襲警等嚴重罪行，呢班政客仲要同佢哋一齊搞事，甚至幫佢哋擋住啲警察，佢哋除咗係同示威者、施暴者「同行」之外，廣男極度懷疑，呢班政客到底有冇犯法。

阻差辦公是履行職務？

近期示威、遊行，呢班政客身影處處，有時仲會聽到啲政客話自己係「履行職務」，但廣男實在唔明，乜立法會議員嘅職務係包括喺衝擊現場「保護」示威者嘅咩？甚至包括阻差辦公？仲有三個多月就係區議會選舉，政客要「蒲頭」做嘢，大家都明，但如果要出現喺違法衝擊現場，甚至挺身包庇暴行，大家真係要問下呢班議員或者政客，佢哋到底去現場係監察、做和事佬，定係想借機生事、搏出位。 

原圖:網上片截圖