如果大家有睇囍雨之前幾篇文，相信對一班逃亡去台灣嘅示威者境況已經有所了解，簡單而言，就係冇書讀、難搵工、靠接濟，想「落地」做台灣人極難。但囍雨覺得最難捱嘅，係仲要承受終日惶恐嘅煎熬。可能有人會心存僥倖，覺得「怕咩啊！反正犯事嗰陣蒙咗面、戴咗口罩，只要捱過一年半載，等風頭火勢一過，番嚟唔會有人記得、認得，又係『好漢』！」囍雨想講，咁嘅諗法實在太天真，犯事者可能逃得一時，但大家幾時見過「逃得一世」嘅例子呢？

就以之前提過嘅示威者阿Jack（化名）為例，大家可能有所唔知，當日佢之所以決定連夜逃亡，就係因為衝擊完立法會、離開途中乘坐小巴，竟遇到警察截查而被「抄牌」記下身份證資料，擔心總有一日查到埋身；但就算離開咗香港嘅生活圈子，去到台灣一樣唔敢「見光」，人多嘅地方唔敢去，連接受訪問都要搵個貧民住宅區，大家又諗下點解？

天眼人眼 無所遁形

囍雨就話，相信連阿Jack自己都知道，呢個世界唔係犯法時戴咗口罩、蒙晒面，然後躲去一個陌生嘅地方就可以「高枕無憂」。先唔講警方可以循唔同地方嘅閉路電視系統進行追查，依家舖頭有裝cam、車輛有裝cam，更何況人人都有手機，隨時影緊嘢。就好似之前林子健單嘢咁，警方幾乎就係憑住各種cam、cctv嘅畫面，串聯起佢「來去自如」嘅全過程、路線圖。退一步講，蒙面戴咗口罩都好，但身體形態、衣著裝束、甚至步伐動作，全部都有得參照對比。林子健果時都一樣戴咗口罩甚至戴埋帽，但佢嘅身形特徵、包括行路姿態照樣令佢無所遁形。

如果大家覺得林子健嘅例子唔夠可比性，咁又睇下2016年旺角暴動嘅第五被告袁智駒，案情清楚講到佢「當時頭戴黑色頭帶，面戴白色口罩，身穿黑色長袖上衣」，但結果就大家有眼見，就係一樣被查、被捕，今時今日已經承擔緊刑責。

「見唔到個樣」就冇事？

嚟到呢度，囍雨必須要講句，其實只要犯咗法，總有蛛絲馬跡留低、總有線索可查，千記唔好以為「見唔到個樣」就會冇事，咁嘅諗法絕對錯誤，就好似掩耳盜鈴，但終有一日會墮入法網、罪責難逃。想冇事，最簡單就係唔好犯法！對於一班逃亡台灣嘅示威者，囍雨想再勸一句，既然犯咗法，就唔好心存僥倖；與其惶惶不可終日，不如勇於面對責任返香港自首，唔通真係要成世唔見得光咩？

原圖：鳳凰網