依家全城焦點，都係睇緊元朗聽日會唔會發生暴力衝突，甚至係大家唔想見嘅流血事件；喺呢個時候，好多人都叫大家冷靜理性，唔好入元朗，或者就算入元朗都好，千祈唔好生事，令自己同埋其他人受傷。但《生果報》近日就反行其道，一時話香港人要「晒冷」，一時又話要「光復元朗」，大有煽動上街、等睇「流血事件」嘅味道，今日《生果報》評論員李怡撰文，除咗一邊想「越多人參與行進元朗」外，更直言就算特首下台都無用，因為解決唔到「自由與獨裁不能共存」嘅矛盾。言下之意，李怡想叫人上街，再意指政權係「獨裁」，所以要推倒嗎？

問問題等於指控「證據」？

喺廣男評論李怡煽動人上街前，廣男想先回應李怡意指事件同「政府有關」嘅問題先，李怡提出一系列問題，包括「誰有權命令警方袖手？」等，稱即使無事實嘅證據，都有「推理上嘅根據」；廣男想問下，何謂「推理上嘅根據」，就事件提出質疑，呢啲係假設，係有待查實嘅假設，但問完問題就當成「根據」，然後講到人哋真係有勾結咁款，唔係咁兒戲呀？

李怡又話外國媒體、政客都意指政府、中央「請黑社會」或者「背後策劃」，稱「幾乎所有的國際媒體，在報道元朗恐襲時，都認為事件與政府有關」，廣男又有問題，有媒體講或者猜測又如何？如果套用李怡講法，有媒體話黎智英係盲反派金主，有媒體話黎智英係動亂黑手，又有媒體講過黎智英涉嫌犯下恐嚇等刑事罪行，呢啲都有媒體講㗎喎，李怡又點睇呢？

想香港重演六四

另一個其心可誅嘅地方，係在於近期發生咗咁多暴力流血事件，《生果報》以至李怡都仲要煽動人上街，李怡稱「越多人參與行進元朗，就越能表現出我們的自由意志」；之前《壹傳媒》老闆黎智英話香港可能重演六四事件，之後《生果報》頭版報道話香港人7.21「晒冷」，往後又頭版報道「光復元朗」，《生果報》仝人係咪想香港「重演六四」流血呢？

尤其甚者，廣男睇到李怡話「林鄭下台，接受五個訴求，可以緩和一時，卻不能解決『自由與獨裁不能共存』這個深層次矛盾」、引述艾未未稱「獨裁改變不了這些事實。擊敗它只是時間問題」時，加埋黎智英話可能重演六四、《生果報》谷人上街等情況，廣男覺得事情已經好清晰，就係黎智英、《生果報》以至李怡係「項莊舞劍，意在沛公」，反修例係一個名目，向港府、中央「潑污水」，反政府、反中央甚至要推倒政權，先係佢哋嘅真正目的。 

原圖:RTHK