噚日囍雨寫文講過，一班喺7.1衝擊立法會後「逃」到台灣嘅示威者，一邊喺台灣唔知「留得幾耐」，一邊如果返香港就可能要面對審訊、刑責，可謂「為示威，斷終生」；呢篇文章出咗無耐，就有朋友分享咗一篇報道被囍雨，話有媒體訪問咗喺台灣「逃亡」嘅緊嘅示威者，標題更用上「逃亡義士：心灰意冷 已有準備回港受審」。睇完果篇報道，囍雨都覺得有啲唏噓，一個前途大好嘅年輕人，美其名係「流亡義士」，實際係「逃走疑犯」，佢哋就係因為示威、衝擊，令自己惶恐終日，下半生前程不明，吉凶難料。

心灰意冷 準備回港

有網媒特意派記者到台灣尋求「義士」，終於找到一位自稱阿Jack（化名）嘅示威者接受訪問，訪問都未正式開始，阿Jack就怕西門町人多，要求到貧民住宅區接受訪問；對於喺台灣嘅前程問題，原來阿Jack嘅簽證有效期得30日，隨住限期越嚟越近，都未被告知簽證延期安排，佢哋一班「逃亡」人士圈子裡面彌漫住不安，如果情況好似林榮基咁，即係無限「續簽」，一班「逃亡」人士開始感到台灣政府態度消極，就係唔想多理，甚至社交媒體都有來自台港社運界嘅冷言冷語，話台灣政府都要提防「共諜」，質疑難道要全部香港人都救。

對於無法自力更新、要受台灣團體接濟，又唔可以同香港「戰友」共同進退，阿Jack思鄉情緒日漸強烈，坦言心灰意冷，並且有心理準備返香港受審，仲話「坐完出嚟又一條好漢，好過成世唔見得光」；如果落機無俾人拉，就繼續上街示威，「個個禮拜出黎同佢哋打到死為止」。睇到呢度，大家有咩感覺，囍雨心入面就只有三個字嘅反應，就係「何必呢？」

惶恐不安 不如自首

睇完網媒呢篇關於「逃亡」台灣嘅示威者專訪，囍雨感受到，呢班去咗台灣嘅示威者，佢哋唔係「無畏無懼」，唔係唔怕要承擔罪責；相反，佢哋依家面對緊嘅，係一種好矛盾嘅心態，佢哋一邊驚要返香港接受審訊，但另一邊又開始思鄉。其實，本來佢哋完全唔需要面對呢種困境，甚至佢哋本來係對未來充滿寄望，就係因為示威、去衝，搞到自己陷入進退維谷、隨時面對刑責嘅困境。睇到呢度，囍雨真係想問下啲政客，如果佢哋知道班後生仔要衝，佢哋係咪都仲會煽動佢哋上街抗爭？惻隱之心，人皆有之，就算人哋唔係我哋嘅子女、子侄或者後輩，都唔應該再煽風點火，令年輕人失去自己嘅「未來」。 其實如果佢哋逃唔過良心責備，返香港自首亦未嘗唔係一件好事！