幾日前喺上環同元朗都出現暴力事件，盲反派對於元朗暴力事件「如獲至寶」，不斷譴責暴力，甚至稱事件係「恐襲」；而向來同盲反派政客「合作無間」嘅《生果報》，今日仲用頭版報道，大字標題寫住《元朗恐襲 ICAC查警黑勾結》，講到廉署已經查緊警察咁款。好笑嘅地方在於，廣男睇呢篇「驚人報道」嘅時候，發現內文係寫住「至於廉署是否『開file』調查，要視乎事件有否涉及貪污指控」，即係廉署查唔查，開唔開file都未知，廣男就懷疑根本無case可言，《生果報》就用頭版話ICAC「查」警察，呢啲算係咩新聞？

廉署稱跟進 = 查警察？

《生果報》用呢種近乎「捏造」新聞嘅手法，廣男都已經見慣不怪架喇，但佢哋今次用頭版大字標題話廉署查警察，實在有啲過分。廣男睇番篇報道，盲反派立法會議員尹兆堅去廉署舉報，話元朗指揮官等警務人員「涉嫌」觸犯公職人員行為失當，促請廉署調查，廉署表示會跟進投訴；睇到去內文差唔多最底部分，除咗一句廉署會依法嚴肅跟進，剩係引述不具名人士話廉署係咪開file，要睇下事件有冇涉貪指控。即係話，有人投訴，廉署話跟進，連有冇可能開到file都未知，《生果報》咁就話ICAC「查」警察，有冇誇大成分，甚至有冇誤導成分，大家可以自己判斷。

事實上，《生果報》嘅所謂報道，剩係條題嘅字，已經有先入為主，甚或係抹黑嘅成分，大家諗下，依家無實質證據證明佢哋所謂嘅「警黑勾結」，佢就講到廉署會調查「警黑」勾結埋一齊咁款，之後內文除咗一句廉署會跟進，其他所謂嘅指控，全部都係一面之辭，甚至搵盲反派議員林卓廷評論幾句，咁就叫新聞？

慎思明辨最重要

其實《生果報》搞呢啲所謂新聞都唔係第一次，早前佢哋報道荃灣劏房搜出爆炸品，係用商戶說話質疑劏房點放得落大批爆炸品，原來事實係，爆炸品1.5公斤，試問100呎嘅劏房又點會放唔落？面對《生果報》等媒體嘅所謂新聞，大家一定要慎思明辨，睇清楚、思考下，呢啲媒體講嘅嘢，係咪真？可唔可信？好似上述嘅報道咁，講到煞有介事，但原來廉署係咪會開file查件事都未知。如果有人分析、認為加投訴咗就等於有人被查，廣男相信《生果報》要全港任何市民、團體「被查」，都絕對「無難度」！ 

原圖:RTHK