就住7月21日晚相繼喺中、上環及元朗接連發生嘅暴力衝突事件，近日多次表態反對暴力嘅港大校長張翔，日前再度向全體港大師生、校友發出電郵，重申暴力不是解決辦法，呼籲社會各界以安全為重，並且以互相尊重嘅方式理性討論，尋找破解困局之道。廣男認為，張翔呢封電郵，一如既往堅守住反暴力嘅原則底線，有如為依家呢個遭受重創嘅社會注入一道正能量，同時亦都體現咗張翔作為一個教育工作者「以人為本」嘅理念，以及「以仁為本」嘅情懷。

反暴力 不妥協

相信大家都記得，喺七一衝擊立法會事件發生之後，張翔就明確公開表態譴責暴力，儘管一番正義之辭反惹嚟多方「圍剿」，要求佢「收回冷血言論」，甚至對佢人身攻擊，但張翔始終堅持反暴力嘅原則，無論面對學生喺佢寓所「圍堵聲討」，抑或其後與港大師生公開對話，佢呢條底線都從未退讓。而今次，張翔更加以「暴力永遠不是解決方法」為題，強調近日嘅事態發展令佢「更加堅信暴力永遠不會是解決辦法」；佢又表示，一方面擔心學生及港人安全、希望傷者早日康復，另一方面亦希望社會唔同持份者以平靜、理性、及相互尊重嘅方式解決問題，「社會必須要尋找一個解決方法，並繼續向前邁進」。言辭之間，有關懷、有建言、更有人情味。

觀乎時下嘅香港社會，無論係有政治理想嘅年輕人，定係想「保家衛族」的居民，可能佢哋嘅初衷都值得理解，但偏偏就用咗最錯嘅表達方式。廣男真係好希望呢「兩班人馬」都可以冷靜落嚟、聽一聽張翔校長嘅肺腑之言，然後諗一個問題，就係如果有朝一日，我哋真係凡事都用暴力去解決，咁就算一時達成目的，但社會付出嘅代價將會係法治蕩然無存；一個犧牲咗法治嘅香港，仲係咪大家安居樂業嘅家園？呢個又係咪我哋想留畀下一代嘅生活環境？

持份者 皆有責

停止暴力只係第一步，廣男覺得，張翔喺信裡面仲提醒咗大家另一個重點，就係大家唔好忘記，我哋嘅社會需要「繼續向前行」，但搵出解決之道，就需要唔同持份者共同參與，簡單而言，就係修補社會撕裂「人人有責」，每一個人都應該首先由自己做起。廣男覺得，相比起一班政客動輒互相指責、謾罵甚至攻擊，張翔嘅忠言顯得有建設性得多，值得大家好好睇一睇、諗一諗。廣男就覺得，當睇過張翔呢封信，大家或許都反思一下，平靜、理性、以及相互尊重，又係咪真係咁難做到呢？

原圖:文匯報