元朗日前發生暴力事件，有穿上白衫人士喺元朗西鐵站追打在場黑衣人士，全城譴責發生喺唔同地方嘅暴力事件。事後警方喺元朗同天水圍拘捕最少七名男子，部分人有黑幫背景。廣男覺得，警方執法，開始拘捕涉案人士，正好證明警方責任就係執法，而且不論身份、政治立場，有人犯法，警方就要將佢哋繩之以法；不論黃、藍、綠色，都應該支持警方執法，齊聲向暴力說不！

警方仍積極搜捕

警方指出，被捕者初步涉及非法集結，日後經蒐證同諮詢法律意見後，唔排除控告更多罪名，亦相信接下來會有更多人被捕，重申警方絕唔容忍任何暴力行為，不論政治取態，只要有人犯法就會執法唔會姑息任何違反法律嘅人。換句話說，警方會依法辦事，只要有人用上暴力手段，就要付上刑責。

廣男覺得，無論係警方，抑或係其他社會人士，都有一條不可踰越嘅底線，就係暴力不能接受。白衫人士打人，要拉要告；示威者犯法，無論係衝擊、襲警、縱火或者刑毁壞，一樣要執法。否則，社會好容易就有錯覺，令人誤以為持某啲政治立場嘅人肆意妄為就無事，其他人犯法先要被依法追究。所以，政治立場絕對唔係護身符。

支持警方執法

喺呢個關鍵時刻，香港亟需警方嚴正執法令香港可以重回正軌。可能有人會懷疑警方，認為警方做得唔夠好；但廣男覺得，如果警方刻意不作為，咁佢哋事後就唔會調查、拉人。既然警方已經開始執法，大家應該觀察一下警方嘅後續行動如何，然後再作評論。誠如警務處處長盧偉聰所言，警隊與黑社會絕對誓不兩立，廣男始終相信，警方執法、維持社會秩序，係香港作為安全城市嘅重要支柱，以前係咁，相信將來都係一樣。

作為普通市民，我哋亦唔係無嘢可以做，如果想香港回復和平，大家應該冷靜落嚟，並呼籲身邊親友都保持冷靜，如果繼續對抗、內耗，只會令香港受傷更深，撕裂更加嚴重。當個別人士話要繼續光復行動，意味社區極可能再爆衝突，大家真係要慎思。 

原圖:RTHK