之前有傳媒報道，有幾十個有份參與7.1衝擊立法會嘅示威者，分批逃到台灣尋求庇護，而台灣的總統蔡英文，就表示「這些來自香港的朋友」，會基於人道作適當處理，但有消息指出，要俾一批「未被拘捕」嘅香港示威者延長居留有技術困難；即係話，班示威者係咪可以長期留喺台灣，都係一大疑問。囍雨就覺得，為咗表達政治訴求，用上明知係違法手段，仲要搞到「潛逃」，一生前途，就此「玩完」，真係值得咩？

台灣會俾示威者長期居留？

對於呢班示威者係咪可以長期逗留喺台灣，其實係一大疑問，首先有不願透露姓名嘅律師指出，呢批人要申請延期居留台灣，技術上有困難，因為班人喺香港根本未被警方拘捕，而且佢哋行動時帶晒口罩，無法向台灣證明自己衝擊過立法會。囍雨覺得情況就好似林榮基咁，相信佢都只係每三個月申請延期居留，係咪每次都可以申請到可以繼續留喺台灣，其實好難肯定。更況何，台灣並無先例為港人提供庇護，所謂《難民法》亦未立法，邊個肯定一班示威者可以長留台灣？

依家嘅客觀情況就係，就算班示威者可以繼續逼留喺台灣而唔駛返香港，意味佢哋呢一世都可能返唔到香港，一世都係逃犯；如果佢哋返香港呢，就要面臨被起訴暴動罪以至煽惑暴動等罪，隨時要坐幾年甚至十年監，之前參與旺角暴動嘅梁天琦被判六年監，盧建民就被判咗七年監，被認為係案中主犯嘅黃台仰，就已經潛逃到德國，如果一番嚟相信會即刻被捕、被扣押。呢班逃到台灣嘅7.1衝擊人士，係咪想好似梁天琦或者黃台仰咁？

凡事有後果 不應太天真

事實上，我哋每做一件事，都有後果，尤其係做咗違法嘅事，一旦被捕、被告，就可能要付上刑責，並唔係話帶咗口罩就無事。大家諗下，林子健老作俾內地人員擄走單嘢，佢行動果時唔係一樣戴咗口罩甚至戴埋帽？最後控方都係憑住身體特徵，令法庭信納閉路電視見到「來去自如」嘅人就係林子健，斷定佢話俾人擄走根本係「老作」，將佢入罪。所以當一班年輕示威者以為帶個口罩就無事，囍雨覺得實在太天真喇！

已經走到台灣或者打算去台灣嘅示威者，喺佢哋面前，幾乎就得番一係「潛逃一世」，一係喺香港「等俾人拉」、接受審訊嘅命運；至於準備繼續抗爭，甚至勇武抗爭嘅示威者，係咪想步佢哋後塵？潛逃唔係一係好玩嘅事，就算曾經揚言「寧為玉碎」嘅黃台仰，據報都曾經因為無得番香港而痛哭，而因為旺暴被判七年監嘅盧建民，就算父親患重病都唔可以探望；呢啲違法後果，唔止係驚與唔驚，而係違法後，面對一種有家歸唔得、被困鐵籠中嘅嚴厲懲罰。 

原圖:文匯報