噚日民陣搞遊行，遊行之後「照例」升級，變成一發不可收拾嘅暴力流血衝突，有示威者不顧警方嘅不反對通知書，衝破警方防線將遊行範圍「自行」擴充到金鐘、中上環再到西環，劍指中聯辦大樓，除咗玷污國徽外，更出現掟嘢、放火等暴力行為。廣男覺得，民陣所謂嘅「和平遊行」，根本就係一個搭台俾示威者搞事嘅前奏，尤其係民陣暗示叫人繼續向金鐘、中環方向前進，同叫班示威者去搞事，其實無咩分別。

市民自然要搵出口？

民陣之前就遊行終點定為灣仔作出上訴，岑子杰已經講過，如果灣仔人潮「無路可走」，市民「自然要搵出口」，合理做法就係市民向金鐘方向離開；噚日遊行結後，據報民陣雖然有呼籲市民解散，但亦揚言金鐘、中環方向「過得去」、「注意安全」，懷疑鼓吹人唔遵守不反對通知書。廣男只想講句，民陣搞遊行，成日遊行完都出事，民陣係咪搭台俾人搞事，真係值得商榷。

撇除噚日民陣搞嘅遊行變成流血衝突，民陣上個月9日搞遊行，遊行明明已經去到金鐘嘅終點，但民陣當時就叫人唔好走，留低一齊預演「佔領」立法會，又突然向在場人士提供法律支援電話號碼，之後當晚就發生示威者衝擊立法會、襲警甚至佔領道路嘅衝突；去到6月12日，衝突全面升級，示威者擲磚、鐵枝等，暴力程度令人慘不忍睹，民陣近期搞嘅遊行，基本上都一定出事，廣男真係唔明，民陣咁執意要喺咁緊張嘅時刻搞遊行，係想俾機會市民表達訴求，定係佢哋都想有人借機衝擊，Keep住反政府行動嘅熱度。

「和理非」保護破壞者

所以，遊行、佔領道路、衝擊同爆發流血衝突，幾乎已經成為民陣以至其他反修例人士搞遊行集會嘅「必然流程」；而對於噚晚一班示威者好似有恃無恐咁搞事，就令廣男諗起喺班示威者7.1衝擊立法會當日，港大畢業生、「港獨」分子梁繼平就呼籲示威者留守，話只要能夠得到更多「和理非」人士在外圍保護佢哋呢班破壞者就無問題，其實依家嘅情況亦一樣，一班激進示威者得到部分「和理非」支持，又有民陣呢啲「大台」搭好個台俾佢哋做嘢，對於一班血氣方剛嘅年輕人而言，其他人都衝，自己又點可以唔衝呢？ 

原圖:中通社