民陣噚日發起嘅反修例遊行結束之後，一批示威者轉往西環中聯辦進行圍堵、搗亂。期間，少部分激進分子向中聯辦門口懸掛嘅國徽投擲漆油彈，令象徵國家尊嚴嘅國徽嚴重污損。囍雨喺度要嚴肅指出，玷污國徽等於公然踐踏國家尊嚴、甚至無異於向國家主權宣戰，已經屬於干犯罪行，必須嚴厲譴責並且依法追究。除此之外，囍雨更加要請大家留意嘅係，根據傳媒報道，喺一班示威者衝擊中聯辦嘅過程中，更有人破壞中聯辦後門，試圖衝入大樓。囍雨認為，一班激進分子已經唔單止要搗亂、破壞，更似有意圖要係中聯辦重演「攻佔立法會」嘅一幕。

試圖衝入中聯辦大樓

綜觀傳媒報道，囍雨認為，衝擊中聯辦事件極有可能係有預謀、有部署嘅行動。事實上，當民陣嘅遊行結束後，就有一班黑衣人湧往西環方向，期間已經見到唔少人開始戴上口罩、集結物資；其後示威者集結中聯辦門外，有人開始向門外標誌及國徽掟蛋、擲漆油，又喺外牆噴上「反送中」及極度侮辱嘅「支那」等字句；差唔多同一時間，一班人就轉去大樓後門，強行打開鐵閘，呢班示威者為咗避免被認出，又以雨傘阻擋傳媒拍攝，更有人破壞閉路電視。可見呢班人根本有備而來，甚至一早就打算伺機衝入大樓。

眾所周知，「中聯辦」顧名思義，就係代表中央政府嘅駐港機構，係國家機關之一，某程度上亦都代表住中央政府嘅權威，負有憲制責任；而國徽嘅象徵意義就更加莊嚴、神聖、不容侵犯。依家一班人衝擊中聯辦、公然損壞國徽，其行動已經擺到明就係要將抗爭嘅矛頭直接指向中央、國家。囍雨要講嘅係，大家已經唔可以再將呢啲行為理解為普通嘅搗亂、破壞咁簡單，而係有一班人破壞緊憲制秩序、衝擊「一國兩制」，更加係挑戰緊中央政府同國家主權。囍雨大膽猜測，呢啲行動嘅出現，極有可能又係有「港獨」分子參與其中，進行策動、直到實施。

如果得逞 不堪設想

囍雨就覺得，一班激進示威者（甚至可以話係暴徒）可能都覺得七一衝擊立法會係「成功一仗」，打爛香港嘅立法機關大樓就如同象徵「征服」特區管治權，而今次就更加打算「更進一步」。大家只要諗番七一衝突嘅一幕幕慘烈景象，就會發覺今次好多衝擊手法都十分相似，喺上環衝突中，同樣出現有組織嘅進攻、示威者亦都帶備各種攻防器具，甚至有人喺距離中聯辦唔遠嘅街道縱火燒雜物，明顯就係有心「搞大件事」。大家試諗下，如果真係畀班激進暴徒衝咗入中聯辦，必然又會好似打爛立法會咁大肆破壞，後果又會不堪設想；但更加嚴重嘅問題係，如果真係畀一班暴徒得逞，連國家機關、國家權威都可以成功衝擊，咁以後佢哋仲有咩係唔可以破壞呢？

原圖：網絡