因為反對《逃犯條例》修訂，甚至可以話反政府、反中央，反對陣營行動「沒有一刻停止過」，儘管近期已經發生過唔少次暴力流血衝突，都仲有團體喺呢個時候搞遊行，其中有人劍指金鐘，亦有媒體話今次要「晒冷」；喺呢個嚴峻時刻，建制陣營亦計劃喺金鐘舉行集會「守護香港」，表明要反對暴力、反對違法衝擊。囍雨覺得，如果大家希望香港唔會亂落去，唔再受個別激進人士破壞，就應該企出嚟，守護香港，守護法治，守護香港幾代人辛苦建立嘅家園！

近日亂狀 慘不忍睹

由6.9衝突開始，香港嘅亂局不但未有止息，反而有俾人「越搞越亂」嘅感覺，6.12由大批人衝擊警方防線、襲警，之後有人圍警總等執法部門或者政府辦公大樓，到7.1暴力行為全面升級，立法會俾激進示威者打到「稀巴爛」；之後到九龍遊行、上水遊行以至沙田遊行，都出現不同程度嘅暴力衝突，警察受傷、示威者受傷被捕，甚至連路過市民都受傷，再咁落去，只怕香港會越嚟越亂，更多香港人會受傷。

囍雨認為，喺呢個亂象橫生、法治不彰嘅時候，有好多人覺得唔妥，但選擇唔出聲；囍雨必須指出，如果「乜都唔做」，靜待狀況「自己變番好」，恐怕未等到社會恢復秩序，香港社會、香港人以至不同行業人士已經受到重創。所以如果大家想守護香港、守護法治，應該趁今次機會，企出嚟，話俾其他市民聽，我哋反對暴力，反對自己嘅家園受到破壞。

不甘心 要發聲

有意見認為，就算企咗出嚟，亂狀都未必有改善、未必有改變，呢個講法啱唔啱，囍雨唔知，但囍雨覺得，如果大家願意行出嚟，起碼可以喺依家「暴力成風」嘅時候，話俾其他人聽，香港人好多都唔支持暴力，唔認為表達政治訴求要用上傷害他人嘅手段，囍雨喺度請大家帶着一份不安心、不甘心，用腳步、和平嘅方式表達自己聲音！

反修例人士，唔少都聲稱自己要捍衛香港嘅自由，但佢哋用嘅方法，正正係破壞香港；既然如此，大家就用香港人最引以為傲嘅和平方式，向暴力說不，向破壞香港嘅人說：「不」！ 

原圖：中通社