《壹傳媒》老闆黎智英之前接受《美國之音》專訪時曾經講過，「香港民眾嘅抗爭一定會持續落去」，仲可能引發「六四事件喺香港重演」；而近期黎智英喺美國時，無論見白宮官員定係佢自己發表文章，都不斷強調依家香港人係「為美國而戰」、「官逼民反嘅暴亂爆發，後果場面難以想像，中共點會唔恐慌」等等。囍雨就睇到，黎智英旗下嘅《生果報》今日就喺頭版渲染「7.21香港人再晒冷」。順住咁嘅脈絡，唔知大家會諗到咩呢？囍雨就喺度諗，黎智英咁搞法，係咪想趁住依家嘅示威遊行，喺香港谷起一場流血暴亂、實現佢嘅「預言」重演「六四」呢？

據報道，民陣喺嚟緊7月21日會再度發起遊行，由維園起步行至終審法院，聲稱係以「獨立調查、捍衞法治、守護真相、重申五大訴求」為主題，要求政府回應民意。但當過去幾次遊行示威都例牌演變成警民衝突、暴力程度仲不斷升級之時，民陣喺呢個時候堅持再搞遊行，到時會發生咩事大家都心中有數。但呢種憂慮又極有可能變成事實，因為囍雨睇到，已經有連登仔喺網上呼籲，7.21「唔搞終審法院」，而要轉去金鐘，揚言「唔理衝唔衝，7.21去金鐘」、「7.21金鐘全民full gear（全副裝備）」，甚至有人聲言「決一死戰」。囍雨就覺得，依家所謂「晒冷」、「去金鐘」，似乎擺明就係有一班人想乘機「搞大件事」。

想見到香港失控？

囍雨咁講絕對唔係杞人憂天同散播恐慌。事實上，早前黎智英接受美國之音訪問時就講到明，話「如果中共發覺冇辦法控制香港人，就會使用『天安門事件』中嘅武力程度」，又聲稱依家中共「將好多香港人睇成『爛人』」、就好似「希特勒看待猶太人一樣」。囍雨請大家諗下，黎智英喺呢個時候大講「六四」，究竟係咩意圖呢？無獨有偶，佢嘅《生果報》用頭版報道谷人上街，仲話要「晒冷」，又用顯眼篇幅報道連登你叫「全副裝備」去金鐘，到底佢係估計香港會重演六四，定係佢個心想香港重演六四，所以係咪谷人上街，實在係耐人尋味！

如果暴力再升級……

講到呢度，囍雨請大家回想一下，一個月前當大家都講緊「和平理性」嘅示威遊行時，之後就出現咗6.9、6.12、圍警總、七一衝突等暴力事件；之後當大家又以為「七一衝突」已經係「最壞」之時，但原來「更壞」嘅事件仲陸續有來，時至今日，已經有人被捕、受傷，試諗下如果咁發展落去、暴力再升級，係咪真係要去到「搞出人命」嘅地步先知收手呢？一旦咁嘅情形成真，可能正正就係某啲政客想要嘅結果，但對於成個香港嚟講，只會係一場更大嘅災難。

原圖：文匯報