為咗撐班年輕人繼續「抗爭」，盲反派政客基本上乜都講得出口，有啲話施暴者係守護香港，有啲就話錯在政府、警方，有啲就表明唔會同暴力割席。今日睇新聞，睇到因為違法「佔中」而入獄嘅立法會議員邵家臻，竟然喺獄中發信，稱青年抗爭者嘅信念「滋潤」（watering）咗香港社會；邵家臻咁講，係咪即係連部分激進示威者嘅暴力行為，都係「滋潤」香港呢？點睇都好似破壞緊香港多啲喎！

人在獄中 不忘煽動

根據由《生果報》報道出嚟嘅邵家臻「獄中書」，佢話每日讀報都見到一個「抗爭的香港」，想講青年抗爭者嘅「Be Water」的確「滋潤」（watering）咗香港社會，以及「滋潤」佢同埋一眾在囚抗爭者，表示「謝謝大家」。廣男真係唔係好明，抗爭「滋潤」香港，係咩意思呢？即係抗爭包括破壞、暴力行為，都係對香港好？

講真，年長一輩要支持年輕人，大家明白嘅，但應該要睇下啲年輕人到底係做緊咩先；以今次反修例而引起嘅「抗爭」為例，好多年輕人已經唔係出嚟遊行咁簡單，而係佢哋有堵路、佔領、破壞公物、衝擊甚至襲警，仲要係瘋狂圍毆警察，呢啲非理性及違法行為，真係要支持佢哋？咁樣似係害咗佢哋多啲喎！

邵家臻呢番說話，客觀效果就係表示認同年輕示威者嘅行為，甚至可以話係「鼓勵」哋繼續抗爭，包括使用暴力手段！邵家臻自己要抗爭、要坐監，呢啲係佢個人選擇，但繼續鼓勵嘅年輕人去衝，真係好咩？如果有年輕人因為抗爭被拉、被告、被定罪、留案底、坐監，呢啲係邵家臻想見到嘅？唔好咁啦！

統統都是歪理

喺呢度，廣男必須強調，邵家臻以至其他盲反派政客嘅「鼓勵」說話，全都都係糖衣毒藥，表面上讚年輕人英勇、「滋潤」社會等等，實則就係要佢哋繼續抗爭，甚至繼續「犧牲」；面對呢啲歪理，大家都應該要發聲，尤其係話俾社會其他人聽，我哋唔想年輕人因為抗爭而受傷、被捕，如果班政客覺得一定要抗爭，請自行組隊、打頭陣，唔好搞下一代。