留意近日嘅報道或者網上輿論，大家好容易就會發現一個現象，就係警察無論做乜，都可以俾人批評、話佢做錯，最離譜嘅「故仔」，莫過於一個法新社記者喺示威當中跌倒受傷，啲人竟然可以話佢係俾警察嘅警棍擊傷，睇到人O晒咀。噚晚囍雨上網，又見到一則屈警察屈得好離譜嘅「故仔」，將警察護送一家人離開衝突現場，變成警察「想追打」一家人；囍雨就諗，係咪而家大家睇到張圖，就可以自己「看圖作文」，盡屈警察，最緊要睇完大家都開心，就唔駛理事實呢？

一名爸爸感謝警察護送

事緣日前沙田新城市廣場爆發嚴重嘅流血衝突，期間一個拖住三位女兒嘅爸爸被影到急步離開，身旁有一名防暴警察，有網民就轉發相片，話「黑警」想追住呢一家人「想打」，描述到警察無人性咁款；原來該名爸爸係一名遊客，佢事後喺網上發帖，感謝當晚有份護送佢哋離開嘅警察同記者，等佢哋可以安全返抵酒店，仲話打鬥同暴力係不能解決問題。言下之意，即係警察係護送呢一家人，而唔係想追住嚟打，好明顯，警察又俾人老屈！

囍雨就覺得，喺呢個後真相時代，甚至可以話連「後真相」都無嘅時代，真係有圖都未必有真相，警察做乜嘢，基本上都係動輒得咎；但綜觀近日輿論或者網上言論嘅發展，似乎啲歪論已經充斥到一個令人覺得好可怕嘅現象。如果有人覺得警方執法嚴厲，去評論甚至批評，呢啲係言論自由，但如果警察保護市民都俾人講成係「想打」市民，實在係太過離譜，根本不能接受。

評論請基於事實

喺香港，大家都有言論自由，都可以批評其他人或者團體，包括政府同警方，但囍雨覺得同遊行集會一樣，遊行集會需要堅持和平、非暴力嘅底線，評論以至批評他人，都應該守住基於事實嘅底線，如果為咗攻訐警察就將事實扭曲，呢啲其實唔係評論，係近乎誹謗及散播謠言先真。更重要嘅係，呢啲老屈嘅言論不單止對緩和社會氣氛無幫助，相反會加深雙方嘅仇恨，令到社會更撕裂。所以當各位要評論唔同事件時，請擺事實，講道理，唔好為屈而屈！

原圖:大公報、文匯報