「唔好打喇，死得人㗎！」記者一邊攞住攝錄機，一邊保護身邊已倒下嘅警員，呢一幕發生喺周日沙田新城市廣場，其實呢位攝影記者嘅同事當日喺另一個示威點被示威者毆打，攝記無考慮自己都可能成為襲擊目標，實在可敬！事後果位攝記接受訪問，講咗句「都係命，有死傷不值得」，帶出咗一個顯淺但似乎被忽略嘅訊息，就係人命安全，幾時都應該要顧及同保護。

連續兩晚救人

其實呢位攝記大哥，喺周六上水大遊行嘅時候，已經聯同在場警員出手救過一個突然間奔跑跳橋嘅青年；呢位攝記大哥上前救人，自己亦相當危險，但點解佢依然要挺身而出呢？廣男就覺得，關鍵係在於作為一個人，一個有良知嘅人，見到其他人生命安危受到威脅，只要能力所及，都應該挺身相救。呢啲先係廣男認識有質素嘅香港人，下下用拳頭解決問題嘅人，唔應該係呢個時代嘅人。

生命的價值

呢次救人事件，廣男覺得反映咗香港一直都持守、堅守嘅價值，就係尊重其他人，包括尊重其他人嘅生命價值；老實講，班示威者嘅政治訴求有幾強烈，廣男唔評論，但佢哋有政治訴求，係咪其他嘢包括他人嘅生命安危都可以不顧，可以瘋狂毆打警員呢？答案肯定唔係！別人嘅生命，我哋要予以尊重；別人嘅身體，我哋唔可以隨便傷害；香港嘅法治，亦唔能夠被某嘅人嘅政治訴求所凌駕！

大家喺鏡頭見到嘅，係一班示威者瘋狂圍毆警員，但佢哋所「打」嘅，其實仲包括我哋一向珍而重之嘅法治；當有人因為政治訴求，或者對政府有不滿就訴諸於暴力，咁以後係咪每逢大家有政治訴求，每逢大家有不滿，都可以用「自己方式」解決，包括用上暴力手段呢？就如救咗被毆警員嘅攝記大哥所講，「都係人命，有死傷不值得」，廣男就覺得，因為政治而破壞法治，一樣唔值得。