日前示威者喺沙田搞遊行，之後「例牌」變成暴力流血衝突，喺示威者先佔領、襲警嘅情況下，建制派同政府當然要譴責暴力，而凡事與政府相反嘅盲反派，就繼續支持示威者，開記者會譴責警方。有趣嘅係，當有記者提到有示威者用鐵通、遮等襲擊警方，問立法會議員毛孟靜有咩感覺，同埋會唔會同呢啲暴力行為切割嘅時候，毛孟靜就表明佢哋唔會割席。言下之意，係咪盲反派要與暴力「同行」呢？以前佢哋堅守開嘅反暴力原則，係咪已經煙消雲散？

看不見示威者暴力？

面對記者嘅尖銳提問，毛孟靜似乎答得「理直氣壯」，除咗表明唔會割席之外，仲話冇人會喜歡睇到暴力畫面，但係日前佢哋所睇到嘅「困獸鬥」，係全港市民「公道自在人心」云云。言下之意，毛孟靜以至盲反派除咗唔願意同示威者嘅暴力行為劃清界線之外，亦係想將矛頭指向警方。

囍雨就覺得，如果要講喺沙田發生嘅暴力流血衝突，大家都應該睇清楚事件嘅前因後果，喺遊行期間，遊行人士同示威者的確係和平嘅，但當遊行人士同示威者行到去沙田市中心一帶時，已經有人開始去佔領路面，之後警方行經某商場下面時，啲示威者已經開始掟嘢，據報仲包括磚頭（喺度要強調，高空掟磚，可以掟死人），之後喺商場入面警察被圍毆倒地、被咬斷手指等，相信唔駛囍雨講大家都知道。發生以上暴力行為，盲反派依然唔批評示威者，而將矛頭指向警方，呢個係咪合理？係咪潮流興「不割席」，所以一定要包庇暴力？

「和理非」成包庇暴力黨

如果你問囍雨，囍雨就覺得依家所有盲反派政黨、政客，已經稱唔上「和理非」陣營，而係全部都變成「包庇暴力」陣營，警察追捕違法示威者，係警察濫用暴力；警察俾人打，佢哋可以歪曲事實講到「錯在警方」咁款。尤其甚者，近日喺違法堵路、佔領嘅場面當中，大家都睇到好多盲反派議員嘅身影，當中包括民主黨、公民黨嘅所謂「和理非」議員，呢啲簡直就係助長暴力嘅幫兇，正正係因為佢哋嘅支持，啲示威者個膽先越嚟越大！

喺呢度，囍雨認為大家唔單止要譴責暴力，仲要譴責一直喺度包庇、助長暴力行為嘅盲反派政客；講得白啲，呢班人根本就係等人衝，然後衝出嚟抽水、攞光環，咁樣做仲有無道德良心？

原圖: 文匯報