喺2014年「佔中」前，網上廣泛流傳一本名為《論戰略性非暴力衝突： 關於基本原則的思考》嘅抗爭手冊，裡面講嘅基本上就係點樣搞好一場「顏色革命」，包括點樣搞非暴力抗爭，如何癱瘓政府等等，當時有意見就認為，呢啲所謂手冊，擺明就係有勢力喺背後搞局，想喺香港搞一場「顏色革命」。事隔幾年，近日網上又流傳一份新嘅《抗爭手冊》，教人示威嘅時候點做準備、點防守同點進攻嘅警察等等；見到呢啲咁仔細嘅《抗爭手冊》，以及咁有組織嘅示威、衝擊行動，好容易令人質疑，今次所謂無「大台」嘅反修例行動，背後真係無人組織或者煽動？

令人心寒的《抗爭手冊》

睇呢份「新」嘅《抗爭手冊》，開宗明義講明舊果本有「太多資訊沒有更新」，希望新一份手冊可以「協助所有示威者」，之後就教人去示威嘅時候由準備太空咭、「可以犧牲的電話」開始，教人點做防護裝備、用咩做武器、點樣衝擊、點對應催淚彈同胡椒噴霧同點攻擊警察「方陣」等等。喺呢個已經咁敏感甚至可以話係咁危險嘅時刻，仲有人整呢啲《手冊》出嚟廣傳，到底意欲何為呢？

喺今次嘅反修例風波，盲反派果邊經常強調一班示威係「無大台」、自發參與以及「各有各做」，但綜觀近期嘅觀察，除咗網上出現所謂嘅《抗爭手冊》之外，大家會見到啲示威者喺唔同嘅衝突現場，無論係搬運物資、一批批包裝好嘅雨傘、口罩、頭盔、保鮮紙等「必需品」，源源不絕運到示威地點，佢哋嘅「行動」更加非常有組織、有秩序，現場人士亦不時會由手機Air Drop「收到」最新指示，如果話示威者行動完全「無大台」，或者背後無人指揮、煽動，廣男唔係好信囉！

誰最想香港亂？

有人會堅持，一系列反修例行動，甚至可以話係反政府、反中央行動，係完全由佢哋自發，拒絕俾人話佢哋受煽動、被利用；但廣男想指出一點，就係香港亂，到底對邊個有好處，所以邊個最想香港亂呢？照道理，如果香港亂起上嚟，對本身係香港市民嘅示威者，其實都無咩好處；喺執筆之時，廣男就見到有篇台灣《生果報》嘅報道，《生果報》老闆黎智英話美國官員理解，香港正在「為美國而戰」，稱香港正在進行一場同美國有著同樣價值觀嘅戰爭。睇到呢度，大家有冇聯想到啲咩？ 示威者又會唔會諗到你哋嘅「公義行動」，最後畀人利用成為「美國而戰」嘅工具呢？

原圖:文匯報