有反修例人士日前喺上水同沙田發起遊行，遊行「例牌」變成暴力流血衝突，警察執勤時俾示威者圍堵甚至圍毆，睇到人心都慌埋；喺前日，即係星期六一班示威者喺上水遊行、佔領果時，原本警察追緊一名戴帽男子，但另一名企喺記者隔離嘅四眼口罩男就突然「狂奔」、企圖跳橋，最後由警察同記者「拉番上橋」；事後民主黨立法會議員尹兆堅就屈警察話係「警察追打人」搞到人跳橋，即使被踢爆都仲要死撐，話自己只係按現場消息描述、接受太多記者訪問云云。囍雨認為，盲反派同警方因政治對立起嚟，大家都理解，但講到警察「追打人」、逼人跳橋咁嚴重，尹兆堅係咪過分咗啲呢？

到底是誰追究誰？

尹兆堅作為盲反派政客，屈人有一手之餘，卸膊當然亦有一手啦，佢俾其他人踢爆佢老作、屈警察之後，澄清話係警員救番跳橋示威者，但無就屈警察言論道歉，亦無悔意，一時話自己只係按現場消息「嘗試」描述，一時死撐話警方「追趕」青年，令青年「慌不擇路而冒險跳橋」，甚至稱會繼續追究相關責任。呢個屈完警察仲話要追究警察責任嘅說法，大家點睇？囍雨就覺得相當之無賴！

坦白講，如果睇番現場片段，大家會見到該名青年當時「唔知咩事」要「拔足狂奔」，繼而「嘗試」跳橋，嚴格而言，係幾名警員同記者救番佢，而唔係逼佢跳橋甚至想「累死人」；尹兆堅作為立法會議員，近乎第一個時間行出嚟屈警員，會加深警民之間嘅矛盾，做法極不道德！如果尹兆堅尚有一點良知，應該向警方作出正式、真誠嘅道歉，而唔係堅拒認錯。

政客在現場幹甚麼？

值得留意嘅係，喺近日嘅暴力流血衝突當中，盲反派立法會議員包括尹兆堅、林卓廷、楊岳橋、譚文豪、區諾軒以至朱凱廸等人都有喺示威現場出現，甚至稱自己同警方「交涉」過。囍雨真係唔明，當有人佔領、堵塞路面，甚至挑釁警方嘅時候，一班盲反派議員要同警方交涉啲咩呢？係咪叫警方由得人犯法，千祈唔好執法呢？身為立法會議員，佢哋嘅責任係協助示威者「違法」？囍雨知道、明白今年同出年都係選舉年，但政客為咗政治利益而選擇企喺激進示威者一邊，實在係不應該！

原圖:RTHK