因為喺報章撰文、意指四川汶川大地震為「天譴」、泰國海難係「自作孽」以及港區人大離世係「報應」，《生果報》評論員李怡受盡各方責難，發聲批評佢嘅人包括全國政協副主席梁振英；唔知李怡係咪「心有不甘」，不時都寫文試圖為自己「平反」，佢今日又喺《生果報》撰文，話梁振英對佢發動攻擊，指自己被「污衊」，所以決定將涉事三篇文章收進書中，而書名就定為《天譴•報應•自作孽》。李怡利用報紙平台污衊死者，俾人批評完仲敢話自己本書名就叫《天譴•報應•自作孽》，李怡真係無敵，因為人無恥則無敵！

消費死者 消費到底？

李怡今日喺《生果報》以〈世道人生：當無恥成為時尚——《天譴•報應•自作孽》前言〉為題撰文，大意係想話政府官員、前官員「人到無恥就無敵」，內文更提及自己嘅「天譴」、「自作孽」同「報應」論，稱自己受到污衊，喺啲人無睇過或者睇完忘記咗佢啲文章嘅基礎上，佢決定將涉事三篇文章收進書中，書名則定為《天譴•報應•自作孽》。當李怡不斷重複話人無恥嘅時候，囍雨覺得大家首先應該搞清楚，係邊個無恥先？

綜觀李怡嘅行文，除咗指稱政府官員、前官員無恥外，佢自己重提「天譴」、「自作孽」同「報應」論，好似係想講佢被「屈」，但事實絕對唔係咁。睇番佢意指汶川大地震係「天譴」篇文，寫明「對於地震，我們既要有科學的，也要有非科學的觀察角度」、「就是老天爺的警告。這種非科學的『天譴』，常發生在帝王得意忘形之時」，佢咁講有冇上天譴責災民或者自己國家嘅意思，大家可以思考。

人無恥 就無敵！

至於佢借某位全國人大代表離世後「抽水」所講嘅「報應」論，就寫明「若真有報應的話，報應也不應該落在一個『吻X』小人物身上 … 」，係咪想暗示人哋離世係「報應」，李怡自己亦最清楚不過；最後關於導致數十中國旅客罹難嘅泰國船難，李怡直頭寫「清萊災難是『天作孽』，布吉災難是『自作孽』」，咁好明顯話人哋死係「自作孽」啦！如果咁多文字佐證，李怡都覺得自己無抽「死人水」或者詆譭已離世嘅人，睇嚟最有問題果個，係李怡本人喎！

坦白講，就算政見唔同都好，見到中國人死而幸災樂禍，點講都唔係一件光采嘅事，李怡從不道歉、反省，反而繼續消費死人，囍雨真係要學佢篇文章嘅題目講句，睇嚟「無恥成為時尚」！