歌手何韻詩早前去聯合國唱衰香港甚至中央，招致外界猛烈批評，佢噚日返到香港接受傳媒訪問，話自己只係希望香港「回復」番「一國兩制」，同埋要求「真普選」；仲透露自己下月會再到外地演講，包括美國、澳洲同台灣，去到年尾都有唔同講座邀請佢，聲稱自己會「盡量做」云云。囍雨想講，何韻詩講啲不盡不實嘅嘢唱衰香港、中央，依家仲要「巡迴」演講，唱衰香港？即係抹黑一、兩次香港係唔夠嘅，要Keep住做先得？佢到底搏乜？

所謂指控 不盡不實

對於何韻詩唱衰香港、中央，囍雨覺得大家首先要搞清楚一件事，就係佢所講嘅嘢，係咪真嘅先？例如佢喺聯合國話香港嘅自治出現問題、「一國兩制」瀕臨死亡等等，係咩一回事！香港嘅「一國兩制」以至《基本法》嘅落實情況，基本上無出現過何韻詩所講嘅「死亡」情況，最明顯嘅例子，就係喺「一國兩制」、《基本法》嘅保障下，香港人包括何韻詩享有極大嘅自由同表達意見權利；至於所謂「真普選」，大家就要問下何韻詩，可以喺《中英聯合聲明》或者《基本法》邊度搵到「真普選」三個字呢？所以呢，當何韻詩以至其他盲反派出盡力抹黑「一國兩制」嘅時候，囍雨要講句Sorry，「一國兩制」無問題，只係有啲別有用心嘅人成日抹黑佢有問題！

喺何韻詩指控不實嘅情況下，佢向傳媒披露自己將會去美國、澳洲以及台灣等地方「演講」，意思可以話係，佢要將佢嘅不當言論繼續散播開去，俗啲講就係「巡迴」唱衰香港同中央。講真，一個人要去邊，講啲乜嘢，其他人無權干涉，但如果一個人係講啲不盡不實嘅嘢去唱衰自己地方或者國家（其實據報何韻詩係加拿大籍嘅），咁就大有問題喇；何韻詩咁做，對佢個人嘅「人氣」甚至如果將來從政非常有利，但香港同中央就要受到不斷抹黑，公平咩？

請擺事實　講道理！

所以，當何韻詩講到「一國兩制」瀕死、要「回復」番「一國兩制」嘅時候，唔讓佢攞出證據，話俾大家聽香港而家點樣唔係「一國兩制」法，例如《基本法》係咪已經無效，香港人已經無自由等等。老實講，口號式嘅渲染手法，故然吸引到他人注意，但何韻詩以至其他盲反派政客講到「一國兩制」唔存在咁款，如果係真，佢哋仲可以日日咁自由，甚至將香港講到好似「獨立國家」咁款？咪玩啦！　

原圖:社交網站圖片