中學通識科老師賴得鐘早前因為發表仇警言論，受到各界譴責，之後佢又道歉又辭去公職試圖平息事件之際，又被人揭發原來佢早於2014年違法「佔中」期間，就已經喺金鐘「站大台」發言、煽動啲學生上街。廣男就覺得，賴得鐘嘅「抗爭往績」真係殊不簡單喎。諗番佢之前就「仇警」一事道歉時，一時講到係「因為衝動」，一時又話「唔會影響日常教學」，依家睇嚟，似乎都係大話喎。大家真係要問一句，咁耐以嚟，呢位老師喺課堂上面究竟仲做咗幾多煽動學生、誤導學生嘅事，而又係大家唔知嘅呢？

廣男日前睇到一條傳媒拍攝嘅片段顯示，早於2014年10月（違法佔領已經開始），賴得鐘就已經有份出現喺金鐘集會上面，仲企上台煽動啲青年、學生上街；另外，有報章最新又揭發，佢曾經喺違法「佔中」之後，喺香港電台《通識網》發表文章，談及學生會選舉時寫到，「我不是說中學要大搞政治社會行動（但如果同學有此抱負，我倒是十分支持甚至尊敬的）」，明顯就係企圖將校園政治化；而今年5月28日，佢又喺社交平台發貼文，曲解《逃犯條例》內容之餘，仲叫啲同校學生、老師參與6月9日嘅「反修例遊行」。廣男真係要問一句：賴得鐘仲有幾多嘢係未被揭發架！

為人所不知的一面

廣男喺度諗，一個老師用惡毒言論、公開仇警，其實本身已經有違師德，被人揭發、公開咗，佢就道歉、辭職，但大家見唔到、被隱瞞嘅又有幾多類似嘅事呢？如果話，發表仇警言論尚且係賴得鐘一個人嘅取態，咁大家要諗下，當佢公開發表一啲煽動人上街嘅言論時，又有幾多人受佢影響呢？依家眼見一班青年學生受政客所謂「違法達義」思想嘅誤導而走上街頭、甚至訴諸暴力，社會各界已經痛心疾首，但原來喺校園，仲有好似賴得鐘咁嘅所謂老師，早早向學生播下「抗爭」嘅種子，社會各界真係應該馬上高度重視呢個現象。

設機制監督老師教學

廣男真係唔知，教育界仲有幾多好似賴得鐘咁嘅老師或者從業者，但真係好想知，呢啲人平時喺學校究竟係點樣教書、點樣引導學生呢？佢哋嘅政治立場真係唔會影響教學？廣男對此真係好懷疑，所以喺度都想講一句，教育界係咪需要設置一啲監管措施呢？例如如果遇到賴得鐘咁嘅情況，學校應該點處理呢？有冇機制或者監督措施，可以保障老師喺課堂能夠保持政治中立、客觀持平咁向學生講述政治議題呢？

講到呢度，廣男又諗起之前果位勇於揭露校園「黃絲」風氣嘅英華女生，如果唔係佢揭發，廣男真係好難想像，原來政治侵入校園會咁嚴重，甚至竟然會有中立學生喺學校被針對、被欺凌嘅事情發生。依家睇嚟，上述事件可能都只係成個教育界嘅冰山一角，大家真係要反思，點樣先可以防止「賴得鐘們」繼續將政治帶入校園呢？如果校園都「淪陷」，成為政治嘅「鬥獸場」，對香港絕非好事！

原圖：視頻截圖