個別激進示威者喺7月1日「強攻」、佔領同大肆破壞立法會大樓，受到各方人士強烈譴責；一向擅長將責任「推俾人」、扭曲是非嘅盲反派政客，就「心生一計」，話成件事係警方嘅「陰謀」，稱警察擺出「空城計」，任由示威者暴力衝擊，完全無視當日警方嘅處境有幾危險。今日廣男睇新聞，見到盲反派元老、資深大律師李柱銘事隔咁耐都仲要加入戰團，聲稱呢個係「大陰謀」，指事件係「精心策劃」；廣男真係想講，班示威者咁有系統地衝擊、破壞立法會，李柱銘唔譴責暴力反而倒過來話受害者（政府、警察）係「精心策劃」地「受害」，呢啲算唔算係「狀棍本色」？

又想老屈政府、警方

今日李柱銘喺《生果報》有篇題為〈棄守立法會的大陰謀〉嘅文章，其大意就係話7.1衝擊立法會事件，係一場幫助建制陣營突破困局嘅暴力事件，因為佢相信全世界無警方會縱容示威者不停衝擊，「如同投降般將大樓雙手奉上給示威者破壞」，甚至質疑帶頭衝擊嘅係真正嘅示威者，定係「幕後黑手」安插煽惑其他示威者嘅「演員」，而警方嘅「容忍」，就要係令「反送中運動蒙上暴力陰影，乃是精心策劃、必不可少的一步」。

對於李柱銘嘅一番偉論，廣男覺得李柱銘首先要搞清楚當時係咩一回事，當日喺立法會大樓以外嘅示威者成千上萬，如果警方硬要喺立法會外作驅散，恐怕會出現流血衝突；又或者，如果班示威者衝入立法會後清場呢，由於立法會入面地方狹窄，又隨時會發生「人踩人」慘劇。睇番當日情況，有示威者投擲白色有毒粉末同投擲着火物體，李柱銘講到警方應該阻止甚至「清場」咁款，佢係咪好想有流血或者人踩人事件發生呢？事實上，警方喺夜晚先採取行動嘅決定，最後並無流血事件發生，印證左警方決定既克制又有效。

李柱銘不譴責暴力

值得大家留意嘅係，李柱銘似乎無譴責暴力或者示威者，甚至稱「先不論帶頭衝擊立法會的，是真正的示威者，還是『幕後黑手』安插來煽惑其他示威者的『演員』」，言下之意，李柱銘係咪想講示威者被煽動、被煽惑，件事其實唔可以怪反修例陣營呢？更重要嘅問題，李柱銘作為「和理非」黨精神領袖，做乜唔譴責暴力，係咪盲反派包括民主黨，已經變成包庇暴力黨？ 定係佢發揮一貫戾橫折曲、混淆視聽本色，將暴力示威者嘅責任轉移到警隊身上？

原圖:RTHK