2016年旺角暴動中，率領人群大叫「三、二、一，衝」嘅逃犯黃台仰，暴動之後喺網上留下「豪情壯語」，聲稱要「寧為玉碎、不作瓦全」，結果呢？人未「碎」，黃台仰就已經棄保潛逃去咗德國尋求庇護，依家仲做埋德國嘅「政治難民」，有書讀仲成日曝光出鏡、喺唔同場合發表反中反港嘅言論。廣男突然提起黃台仰，係因為發覺今日歷史似乎又再重演，喺七一有份「攻陷」立法會、喺議事廳除低口罩發表「佔領宣言」嘅「港獨友」梁繼平，據報衝完立法會第二日，就已經搭飛機去美國。故事之後嘅發展會係點？廣男就覺得，似乎又係行緊同黃台仰極為相似嘅「成名之路」喎。

依家講起呢位梁繼平，相信大家同樣都會對佢喺議事廳嘅「豪情壯語」記憶猶新，尤其係當佢講到「如果撤離就會變成傳媒口中嘅暴徒」、「一齊佔領立法會，人越多就越安全」以及「一世只有一次嘅機會、已經冇沒有回頭路」之時，聽佢「支笛」衝果班人有冇「回頭路」廣男就唔知，不過梁繼平就似乎一早鋪定嗮後路，消息透露，佢表面上仲喺度不停煽動緊啲示威者「留守立法會、繼續衝擊」，其實暗裡一早已經買好機票，有消息指佢衝完立法會第二日就去咗台灣，依家仲已經安全返到美國添！睇嚟真係好有「準備」 喎，擺明又係「潛逃」啦！

其他人又會點？

喺美國華盛頓大學讀緊政治學博士嘅梁繼平，今次潛逃之後，前途又會係點呢？廣男就喺度諗，幾年之後，梁繼平好有可能成為美國公民，喺外國某啲勢力嘅「庇護、支持」之下，完成政治博士課程，之後又可能會成為「學者」，發表啲反中反港嘅「研究」、甚至成為反中標誌……但問題係，其他跟住佢衝擊、佔領立法會嘅後生仔，佢哋嘅人生又會係點呢？廣男想講，真係好抱歉啦，如果涉嫌做咗違法嘅事，咁都好大機會被捕、被起訴、甚至可能要坐監，隨時前程盡毀，最低限度都會有個案底伴隨一生。

殘酷的政治

依家諗番，廣男先明白，點解梁繼平當日會「勇」到除口罩，原來所有嘢背後，一早已經有後路、有鋪排，「衝擊立法會」仲可能成為佢嘅「代表作」，佢越公開身份就越安全，但可憐佢果班「戰友、夥伴」，除咗畀人「踩住上」，睇嚟恐怕就日日提心吊膽、只能等待被拘捕了。廣男真係要講一句：政治最殘酷嘅地方,，在於高高在上嘅行動領袖，永遠都有後路；而冇後台、冇後路嘅年輕人，就只可以等待被犧牲。後生仔，醒下啦！

原圖：Facebook