呢排政治氣候嘅轉變，可以話快到好難跟得上，尤其係一班盲反派政客嘅所謂「公義標準」，更加可以話係一時一樣，令人難以捉摸；好似公民黨立法會議員郭家麒咁，明明發生暴徒衝擊、破壞立法會，佢唔譴責暴力，仲要將矛頭直指政府，但到噚日，佢就由於喺港鐵度俾人「撞咗一下」，第一時間就報警求助，仲稱「不接受用暴力對待任何人，亦解決唔到問題」，擺出一副譴責暴力嘅姿態。一時眼前嚴重暴力破壞行為唔譴責，一時又鬧人用暴力，郭家麒真搞到人「好亂」。

尊貴議員被撞 報警？

據傳媒報道，郭家麒噚日朝早搭港鐵去金鐘，期間喺尖沙咀站落車先讓車廂乘客行出車廂嘅時候，就有個男乘客行出車廂時疑用「肩膊」撞佢，仲要撞完之後露出笑容，郭家麒覺得「不可容忍」，所以就報警，有媒體引述郭家麒說法，佢話「作為公眾人物，不介意言語上有不同意見，但不希望亦不接受用暴力對待任何人，亦解決唔到問題」，對方最後有向佢道歉，雙方就同意和解。對於盲反派政客郭家麒報警、「讉責」暴力，廣男第一個反應係，乜盲反派終於都知用暴力係唔啱嘅咩？係咪針唔拮到肉唔知痛呢？

對於郭家麒報警，廣男首先希望大家千祈唔好笑佢，因為無論係任何人，包括日日鬧政府、鬧警察嘅政客，大家都記得郭家麒喺警方暫不派員駐守醫院嘅問題上，佢幾兇狠咁鬧警察。不過，喺佢哋自己遇上問題，尤其係受「暴力威脅」時，佢哋一樣有權利報警，一樣應該受警察保護，所以大家唔好笑郭家麒，而應該認同佢搵警察處理問題。只不過，有一點令廣男覺得好可笑嘅，就係既然郭家麒自己都知暴力唔啱，咁點解7月1日喺立法會出現襲警、衝擊、破壞立法會嘅暴力場面，佢同其他盲反派政客出嚟見記者嘅時候，又唔譴責暴力呢？唔通警察就可以俾暴徒襲擊，立法會可以俾暴徒大肆破壞，但如果對象係諸如佢咁嘅尊貴立法會議員，暴力先係問題？

任何人對任何人 都不應該施暴

廣男就認為，唔理對象係警察好，以至其他人也好，都唔應受到暴力對待，喺呢度，廣男想請郭家麒設身處地為警察諗下，你自己俾人撞到一下都咁勞氣，而警察們俾人用磚頭、鐵枝、有毒粉末甚至通渠水等襲擊，身心到底有幾難受呢？希望郭家麒下次評論任何暴行包括示威者嘅違法行為時，都公平啲，唔好顛倒是非黑白啦！ 

原圖:RTHK