香港警方噚日公佈，就近期嘅連串示威集會活動，以及針對警察嘅網上「起底」行為，已經合共拘捕28人，並且唔排除會有更多人士被捕。囍雨就發覺，喺呢班被捕人士裡面，有啲涉及包圍警總、暴力衝擊立法會，有啲其實係出席「撐警」集會人士，但都因為涉嫌襲擊而被捕；更加令人心痛嘅係，呢班被捕者裡面，年齡最細嘅只得14歲，而最年長者已經年過70。由此亦可見，警方係以公正、不偏不倚嘅態度執法，所傳遞嘅信息好清楚，無論任何人士，只要涉嫌違法，就要被依法追究責任。囍雨喺度真係想講，停手啦，唔好再暴力對抗、再撕裂對立；更加唔好再令青年、長者都成為政治爭拗嘅犧牲品。

根據警方嘅通報，囍雨睇到，部分被捕人士所涉嫌干犯嘅罪行都相當嚴重，例如「襲警」、「刑事毀壞」、「刑事恐嚇」、「藏有攻擊性武器」等；因涉及參與七一升旗禮場外衝突而被捕嘅人數就相對居多，包括11男1女，年齡介乎14至36歲，可見都係一班青年人甚至未成年人士。另外，涉嫌參與「起底」嘅亦都有9人被捕，原來，至今已經有超過1100名警務人員及其親友嘅個人資料被起底、曝光，更有不法之徒攻擊警察網站、煽動他人刑事恐嚇等，簡直令人憤怒。囍雨認為，社會各界都好應該支持警方執法，因為呢個先至係香港法治社會嘅應有之義。

公正執法 不偏不倚

值得留意嘅係，喺6月30號嘅撐警大會中，都有6位人士因為涉嫌「藏有攻擊性武器」、「襲擊致造成身體傷害」、「在公眾地方打架」等罪名而被拘捕。囍雨相信，呢啲人士中，一定有人原本係想去支持警察而與對立者發生衝突、做咗違法事情，但警方喺執法過程中，依然秉持不偏不倚嘅專業態度，冇因為係撐警人士就當成「自己友」、網開一面，更加唔會選擇性執法。呢樣就係香港嘅法治精神，絕不容忍暴力、違法行為。

停手吧，香港傷夠了

可以預見，呢班違法者未來都可能面臨檢控、起訴甚至刑責，而更令人心痛嘅係，唔知有幾多個家庭要因此而經受打擊，囍雨想講，大家係咪都應該由此反思、體會守法嘅重要性、學識寶貴嘅一課呢？不過，似乎社會上仲有一啲人唔明白呢個道理，仲要講到班示威者衝入立法會「打爛塊玻璃、塗污破壞」好似好小事咁款，甚至有專業團體勸籲警方唔好對示威者再動用胡椒噴霧、催淚彈等，但就完全避而不談有人向警察擲通渠水彈、掟燃燒物、撒毒粉，唔講有幾多警員受傷。囍雨必須要指出，呢啲歪理擺明就係企圖繼續淡化暴力、包庇違法，更要將攻擊之矛不斷對準警方。呢班人究竟想點？想香港亂到幾時、咩程度先肯收手？囍雨只有一句：香港仲傷得唔夠重咩？

原圖：RTHK