警方噚日公布，就住近日嘅示威、抗議同集會，以及針對警察嘅網上「起底」行為，警方合共拘捕咗28人；如果你問廣男點解會搞成點，廣男會好直率咁答，近幾年有政客不斷鼓吹「違法達義」甚至「勇武抗爭」，令年輕人認為除咗暴力抗爭「別無他法」，所以出現咗近日暴力流血衝突不斷嘅場面。其實喺呢個時候，大家最應該做嘅，就係設法令大家冷靜落嚟，唔好再做一啲傷害到社會甚至害到自己嘅行為；可惜，喺呢個敏感時刻，仲要啲媒體喺度煽風點火，甚至美化暴力行為，講緊邊個媒體，咪又係《生果報》囉！

是「加油」 還是加深矛盾

廣男今日睇《生果報》報道，其中兩篇報道都講到一啲當日有入到立法會嘅「示威者」感受，當中有人話自己喺金鐘果邊趕搭尾班車走，喺車廂入面一班人「拍手喝采」叫「大家辛苦啦」，一邊為香港「打氣」，一邊亦為自己「打氣」；又有佔領者稱自己「無悔」，稱年輕人係去到絕望，先決定「犧牲未來」。呢啲故事大概想俾人感覺，呢班示威者好，或者「暴徒」也好，都係為「香港好」啫。

廣男想講，依家有人被捕、有人受傷，喺呢個敏感時刻，媒體最應該做嘅事，係要設法令各方冷靜落嚟，而唔係繼續煽風點火，意圖鼓勵更多人出嚟抗爭；偏偏鍾意撥火嘅《生果報》，近日就不斷美化激烈行為，甚至「英雄化」啲示威者或者暴徒，廣男只可以講句，究竟《生果報》有無政治道德？

事實上，表達訴求有好多方法，但訴諸暴力嘅違法行為，就一定解決唔到問題，而只會令事情變得更壞。廣男綜觀近日發生嘅情況，部分激進人士明顯已經走向極端，佢哋大肆破壞立法會設施，其實亦係破壞緊香港嘅法治，而呢種破壞，肯定唔係短期內能修復或者修補；喺呢個情況底下，作為傳媒，繼續美化激烈行為，其實某程度上就係同人講「你哋繼續衝啦，你哋做得啱」咁。或者對於《生果報》而言，反政府、反中央係佢哋嘅最大目標，但廣男要提一句，傳媒係有社會責任、教育功能，如果只顧政治而忘卻後者，咁肯定成個社會都要一齊付出沉重代價。

用磚頭 點樣傾？

當近期有啲盲反派政客係咁叫政府等出嚟對話嘅時候，廣男真係想問下，當一啲激進人士攞住磚頭、鐵枝，大家又點埋枱傾呢？其實國際政治都係一樣，國與國之間有不和，唔通就要動用槍炮？各方最後必定係以談判來解決分歧。政治唔係要下下搏到盡、去到盡先行得通，有時識得退一步、冷卻一下，先有解決問題嘅轉機。