喺七一示威衝突入面，有傳媒就拍攝到，班示威者強闖入立法會大樓之後，熱血公民嘅立法會議員鄭松泰當時身處大樓裡面，仲講咗一啲諸如「二樓有狗」、「小心啲」嘅嘢，疑似為果班大肆破壞嘅暴徒帶路。雖然事後鄭松泰否認，澄清當時只係「做緊直播、提醒所有人小心」，不過有大律師都認為，鄭松泰嘅行為有「灰色地帶」，唔可以完全排除佢干犯刑事罪行。究竟鄭松泰當時有冇為班暴徒帶路去衝擊、破壞呢？廣男真係唔敢亂講，所以最好嘅辦法，就係促請警方就事件作出一個獨立、公正嘅調查，如果鄭松泰冇做過，咁就還佢一個清白。

廣男睇完條片，都覺得真係有好多似是而非嘅地方。由傳媒畫面所見，鄭松泰當時身處立法會大樓裡面嘅走廊，佢一再向示威者確認二樓係咪有警察之後，就同一班示威者講︰「我上去！二樓有狗！你哋自己要小心」；接住另一個畫面就見到，鄭松泰仲叫正在拍攝嘅記者「唔好阻住呀！」，不過，就冇畫面好明確咁顯示佢為果班示威者帶路。唔知大家聽完鄭松泰講嘅呢堆嘢，會有咩觀感同判斷呢？佢自己就覺得好似被傳媒「砌生豬肉」咁款，仲話「可以剪埋一齊加句VO話我帶路，就算有嗮直播都可以做我」。

「灰色地帶」理應搞清楚

依家嘅問題係，有人話鄭松泰係犯法、帶啲暴徒去衝擊破壞立法會，而鄭松泰又的確講咗啲好易令人有聯想嘅嘢，連執業大律師都覺得好有灰色地帶，所以廣男認為，畢竟有人涉嫌干犯罪行，最好嘅解決方法都係警方展開獨立公正嘅調查，搞查清楚成件事。如果鄭松泰冇帶人去暴動、破壞，冇做任何違法嘢，通過調查就可以話畀大家知，鄭松泰係清白嘅；不過，如果萬一佢真係有做一啲違法嘅嘢，咁廣男都要講句，必須對鄭松泰依法追究甚至起訴。

冇做過就無須擔心

廣男相信，既然鄭松泰都話自己冇做過，咁佢都一定會好支持警方調查清楚嘅。話嗮佢都係公眾人物，又係一個政黨嘅主席，更加係立法會議員，如果因為呢啲「似是而非」嘅證據而畀人「屈」就唔好啦，甚至乎如果因為呢件事而影響埋之後嘅選舉，就更加得不償失。更何況，任何案件，仲有奉行司法獨立嘅香港法庭、法官去把關，到時鄭松泰又可以有充分嘅抗辯機會，唔使驚承擔「莫須有」嘅罪名。廣男都係果句，香港嘅法治精神、司法制度絕對唔會屈任何清白嘅人，只要冇做過，一定會還你一個公道；不過，亦都唔會放過任何犯咗法嘅人，唔理你係普通市民定係議員。

原圖：視頻截圖