噚日出現喺立法會內外嘅暴力衝擊、破壞場面，震驚全香港市民，令人覺得震怒嘅，除咗係一幕又一幕盡情搗亂外，一啲事後嘅「濫情」說話，同樣令人覺得憤怒；明明係暴力行為，事後有人話呢啲係「有秩序地破壞」、「克制地破壞」，有人話被損壞嘅只係啲「玻璃」啫，甚至有人話俾學生嘅激烈行為所「感動」。講真，如果其他人尚有一點良知理智，點解仲要講呢啲鼓勵暴力行為嘅說話？如果真係咁「感動」，你哋自己唔去衝同破壞？作為較成熟嘅人，唔發聲制止暴行，反而喺度推波助瀾，係咪要啲年輕人負上刑責、用上一生付上代價，先叫做好呢？

歪理不斷 煽風點火

綜觀噚日以至今日較早時間嘅輿論，囍雨只能夠用價值觀完全被扭曲去形容。如果有人眼見暴行，但「同情」施暴者，OK，囍雨明白有人始終唔想譴責年輕人，但點解仲要講啲似是而非嘅觀點去繼續「撥火」，等其他人誤以為暴力衝擊破壞「有理」呢？更重要嘅係，暴力衝擊、破壞立法會，有解決過乜嘢問題？答案係無！一班暴徒嘅行為，只係令矛盾激化，令社會受到更大嘅傷害。

是示威　還是想奪權？

囍雨喺度想提提大家，如果大家有留意噚日嘅電視畫面，一班暴徒衝到入立法會會議廳，佢哋馬上衝上主席台，有人將疑似係「龍獅旗」嘅旗幟掛喺主席台，亦有為數唔少嘅暴徒人疊人爬上牆，將象徵特區嘅香港區徽噴黑，呢啲係咩？如果你問囍雨，囍雨會認為，呢啲根本就係想奪權，想搞政變；有人係要衝入立法會，作為佢哋嘅抗爭手段，但點解要肆意破壞？點解要即刻將區徽噴黑？點解要掛出「龍獅旗」，仲要噴上「太陽花」（「太陽花革命」為台灣社運代名詞）？噚日一班暴徒衝入立法會，喺政治層面，除咗宣示到「港獨」意味外，似乎已經完全唔關《逃犯條例》修訂事。

事情發展到呢個地步，好明顯一班暴徒，甚至佢哋背後嘅政治勢力，已經唔係單純反對《逃犯條例》修訂，而係針對住整個特區政府，甚至中央。後生仔覺得自己在做「正確的事」，其他人勸佢哋唔掂都無計，但其他政客、香港市民人生歷練豐富啲，點解唔發聲講出真相，話俾佢哋聽所做嘅嘢係唔啱，係違法，要承擔刑責？反而擺出一副「自責」嘅樣子，好似話俾啲年輕人聽佢哋做緊嘅嘢係啱咁款？如果之後再發生任何暴力衝突，呢班所謂「愛香港」嘅大人，就係最大嘅幫凶！

要自由 亦要法治！

之前囍雨以為，盲反派政客「叫人衝，自己鬆」係十分令人不齒嘅事，但囍雨今日發現，原來一班眼見年輕人胡作非為不發聲制止，然後擺出一副「同情」、「支持」暴行嘅人先係令人最不值。講真，如果用暴力大肆破壞呢套先係啱嘅，咁社會仲需要秩序嗎？仲需要法治嗎？警察嘅安全唔重要？一句認同青年，壞影響唔單止係眼前嘅立法會亂局，而係以後香港再有爭拗，任何暴力行為都可以被「合理化」呀！將黑白是非模糊化！正如有法官指「暴力就是暴力」，無論初衷如何，都要譴責。一班聲言「愛香港」嘅成年人不論係政客、教育界人士及前高官等等，唔好再推波助瀾喇，如果有一日去衝、受傷、被捕甚至坐監嘅係自己子侄，先至感到懊悔，咁就為時已晚喇！　

原圖:文匯報