喺呢個互聯網時代、改圖時代，有時候真真假假，真係唔容易去分辨，廣男今日睇新聞，見到工黨立法會議員張超雄將一張藝人梁競徽（人稱唯唯，改名叫梁競徽前叫梁烈唯）俾網民惡搞、訛稱佢支持成立獨立委員會調查警察嘅「改圖」攞入會議廳仲Show上嚟，雖然明眼人都知張圖係假嘅，但客觀效果就變成藝人「支持調查警察」咁款。呢一種由假變「真」、甚至可以話係偽造、老屈嘅行徑，近期經常出現喺互聯網，廣男就覺得呢種「不去求證，只求『啱用』」嘅偽造、老屈風氣，除咗加深唔同政見人士之間嘅矛盾，同埋誤導公眾之外，真係唔知有咩用處。

張超雄真無知 定真玩嘢？

對於張超雄攞張「改圖」嚟表達「網民支持成立獨立委員會」，圖中人仲要係藝人梁競徽，廣男真係唔知張超雄係真無知，定有心「玩嘢」；因為好多網民都知道，自從反修例遊行開始，梁競徽就係咁比人改圖話佢反修例，甚至啲改圖上埋外國新聞節目。如果張超雄真係唔知，咁佢就太脫離網上輿情；相反，如果佢明知張「圖」有問題而照攞出嚟，咁佢就真係高章，因為咁樣既能引起共鳴，又能夠將訊息「帶出嚟」，只係梁競徽無端端「躺着也中槍」！

警察當然要被「屈」？

呢種「以假亂真」嘅情況，近期可以話係屢見不鮮，例如日前啲示威者又包圍警總，一個警員返番工所以經過，一時就俾人話佢扮示威者，一時就俾人話佢係滲透，講出呢番說話嘅人仲要係盲反派立法會議員包括新民主同盟范國威同公民黨楊岳橋，名符其實，屈得就屈；屈得更過分嘅說法，甚至係有人話呢個警員手持鋤頭、斧頭，實則呢？實則係佢俾啲示威者追住甚至追打，自己只係執起個水撥，喺必要時攞嚟自衛啫！盲反派、示威者以至個別網民嘅「屈」法，真係幾Over都有。

如同上面嘅「道理」，其實個別媒體、政客甚至網民，都係用同樣方式對待6.12暴力流血衝突，當佢哋異口同聲地話示威者無用暴力、無掟磚而被警察「追打」嘅時候，其實從好多傳媒片段都可以睇到，根本就係個別激進嘅示威者衝擊、掟磚、襲警在先；可惜，喺呢個以偏概全嘅資訊時代，好多人都係先入為主，只相信自己嘅主觀判斷，而唔理客觀事實，誤信係警察「亂打人」甚至「亂射人」。其實，只要大家理性、仔細啲去睇近期發生嘅每一件事，就會知道誰是誰非，邊個係先使用暴力、製造衝突嘅始作俑者。