因為6.09同6.12暴力流血衝突，令到醫護人員同警員關係都緊張埋。有新聞報道指，有兩間醫院採取臨時措施，暫時唔會再有警察駐守醫院，希望減少雙方不必要摩擦；有警方職方協會相信，咁係因為近期有警員喺該兩間醫院受到不禮貌對待，消息指包括有護士辱罵警員係「黑警」、「狗」，甚至拒絕警員陪同被捕男子洗傷口。廣男想講，侮辱緊執行職務嘅警務人員，本身已經係有欠尊重；試圖阻撓警員陪同被捕人士，如果發生「走犯」或「傷人」等事件，後果更係不堪設想，唔知咁樣算唔算係阻差辦公呢？

醫護不合作 後果可大可小

據傳媒引述消息指，其中一宗不禮貌事件發生喺仁濟醫院，警員當時陪同一名被捕男子洗傷口時，被醫護人員拒絕進入病房，之後警員敲門，解釋佢有責任看守疑犯，有護士就辱罵佢「你咪入嚟囉，黑/克警」，之後該名警員同疑犯離開病房時，就聽到後面有人講「隻『狗』終於走啦」，而當時警員後面有幾名護士。廣男必須指出，侮辱警員本身已經唔應該，試圖唔畀警員看守疑犯，問題就更大，萬一有起意外上嚟邊個都擔當唔起。

如果傳媒報道嘅消息屬實，真係有護士拒絕警員入病房睇住疑犯，咁廣男想問下，萬一走犯，咁點處理？又或者，如果個疑犯想走而傷及他人，包括涉事嘅護士，咁又點？看似「隨意」嘅不合作，發生起事上嚟，後果真係不堪設想；涉事嘅醫護人士，唔單止係妄顧公眾安全，甚至係佢自己嘅人身安全，都會因為咁而受影響。為咗啖氣，值得咁做咩？

偏見不應影響工作

對於啲醫護人員又幾唔鍾意啲警員，廣男唔知道，但醫護人員例如護士始終都係專業人士，喺處理工作以及同警員嘅關係時，係咪應該專業啲、成熟啲呢？就算有偏見，都唔應該影響工作，更何況，警員都只係做份內事，維護緊香港嘅法紀。至於侮辱警員嘅問題，廣男就覺得，只要啲醫護人員將心比己，諗下自己如果俾人侮辱嘅時候會有咩感受，大概都會知道一啲侮辱警員嘅說話，其實有幾Hurt人！