民陣噚晚喺在中環愛丁堡廣場嘅集會結束後，大批市民喺「民權抗爭」、「香港眾志」、「學生動源」等「獨派」團體嘅煽動下，「轉戰」灣仔警察總部，以鐵馬封堵警總大門、堵塞出入口，及後更霸佔附近多條主要馬路阻塞交通。今次已經係一個星期內，示威者第二度發起包圍警總行動，期間更有部分人作出極端挑釁行為，如掟蛋、粗口辱警、拆毀警總招牌、甚至以鐳射激光照向警員眼部等。囍雨認為，呢啲粗暴惡行已經完全超越「言論自由、表達意見」嘅底線，香港社會絕對不能容忍呢一類違法行為，社會各界都應該予以強烈譴責，絕不可助長侮辱警權、挑戰法治嘅歪風繼續蔓延。

上一次示威者包圍警總，已經製造好多違法衝擊、挑釁，行為過嗮火，而今次就更加有過之而無不及。根據傳媒嘅現場畫面可見，示威者除咗迅速堵塞警總出入口之外，仲有人向警總「送上」狗餅和扮狗吠，又高叫「釋放盧偉聰」、「黑警可恥」等口號；另一批人就帶備噴漆，塗鴉警總外牆、噴向閉路電視鏡頭以及毀壞警徽。更過分嘅係，有示威者以激光近距離直射警員眼部；另一畫面所見，一位相信係上班嘅警員，喺步行到警總嘅過程中，遭到多為示威者「圍攻」，以粗口辱罵、挑釁，更有人故意以身體撞向該名警員。

有人視法治如無物

囍雨要指出嘅係，呢班示威者一而再、再而三包圍警總、挑釁警方、甚至傷害警員，佢哋嘅行為已經明顯演變成為慣性挑戰警權、法治，絕對唔能夠接受！警隊成為政治爭拗嘅磨心，對佢哋已經係極之唔公道；依家一班激進、暴力示威者又屢次喺警署外肆意堵塞、破壞，掟蛋、噴漆，對警員辱罵挑釁，囍雨認為，呢啲行為已經完全超出「表達意見」嘅範疇，更加毫無理性可言，而且已屬違法；佢哋所擺出嘅「姿態」，根本就係視法治如無物、甚至意在以警隊為敵。

支持警方嚴正執法

事實上，喺過去咁多次警民衝突入面，警隊嘅表現一直都忍讓、克制，但市民大眾係咪都應該反思一個問題，就係以法治聞名於世嘅香港，究竟仲要對呢啲違法行為容忍到咩程度、容忍到幾時？所以囍雨要喺度呼籲，警方理應對違法者嚴正執法，社會各界亦都應該支持警方依法辦事追究到底，否則，如果任由呢種侮辱警權、破壞法治嘅衝擊成為「新常態」，對香港社會絕對有百害而無一利。大家唔好忘記，一直以嚟，香港警隊都企喺保護市民嘅最前線，亦都係維護法治嘅最後一道防線，如果呢條防線遭受破壞，香港真係有可能墮入萬劫不復嘅漩渦。

原圖：rthk