因為香港社會嘅政治爭拗，負責維護法紀、社會秩序嘅香港警隊，已經無可避免地成為磨心，但令廣男覺得更加「 心寒」嘅係，依家社會上有一部分人，將「仇警」情緒不斷蔓延，喺網上發起一股「警員起底」嘅歪風。近日，私隱專員公署就證實，由上周至今，已經接獲過百宗警員及家屬被網上起底嘅投訴。廣男必須要講，呢種惡劣行為絕對係一種白色恐怖，而且係專門針對香港嘅執法人員，任何法治社會都絕對唔可以接受！負責保障私隱嘅部門有必要嚴肅跟進，如果有案例涉及違法行為，警方就更應該依法追究到底。

廣男估計，私隱專員公署話至今已經接獲超過130宗投訴個案，極有可能只係實際情況嘅一部分。廣男咁講，係因為睇到有新聞報道話，相信有二三百名警員嘅個人資料被人擺上網，當中大部分更曾參與處理示威任務；報道仲提到，有部分警員感到好委屈，甚至喺警隊內部大吐苦水，相當沮喪、唔開心，更加擔心連累家人、朋友，但又無能為力，只好忍辱負重。廣男睇完真係覺得好心痛，細心諗一諗，警察履行職責、維持社會秩序，究竟何錯之有呢？退一步講，就算有警員涉嫌違法，大可依法律途徑追究，點解要令佢哋承受起底、網絡欺凌嘅壓力呢？

警察不是「公敵」

事實上，經過之前幾次警民衝突之後，已經有人發起抵制、杯葛警察嘅行動，廣男更聽聞有老師聲言要喺學校排擠警察嘅仔女、有醫護拒絕幫警察進行治療，更有人宣揚「禍必及妻兒」嘅恐嚇言論。廣男認為，無論呢啲激進之辭最終有冇付諸行動，客觀效果都係將警察「塑造」成「公敵」；依家又大舉「起底」警察、大曝佢哋私隱，唔單止令好多警員承受網絡欺凌嘅壓力，更加殃及佢哋嘅屋企人喺各自嘅生活圈子裡面，都可能承受儼如畀人「公審」嘅壓力。大家試下換位思考、易地而處，如果自己受此對待，又會作何感想呢？

依法追究到底

更嚴重嘅問題係，如果當越來越多嘅警員都被籠罩於呢種白色恐怖之下，心身都承受巨大壓力，士氣必然大受打擊；當執法者都時刻處於恐懼之中，又如何執法、保護市民、保護香港呢？依家睇嚟，似乎警員所受嘅最大傷害，正正來自佢哋誓言要盡心盡力保護嘅市民，呢個又係咪大家願意見到嘅社會？廣男要指出嘅係，果班有份參與「起底」嘅網民，可能已經觸犯咗香港法例，有關部門實在有必要嚴厲執法，對涉嫌違法嘅行為追究到底。廣男喺度想講，人人都應該有免於恐懼嘅自由，包括執法者。

原圖：文匯報