6.12發生暴力流血衝突，超過30人被捕；講真，任何人見到本來唔係對立嘅示威者同警方起衝突，都應該感到心痛。偏偏，香港就係有好多鍾意「火上加油」嘅政客同評論員，不斷強調「不撤不散」、繼續「抗爭」等等，今日廣男睇《生果報》，就見到佢哋嘅評論員李怡寫文，意指G20前要作「抗爭」，仲稱有啲人喺6.12現場所見，啲年輕人對於被捕表現出「無所謂」嘅態度。廣男真係唔明白，咩叫做被捕都「無所謂」呢？李怡或者《生果報》，係咪又想營造「犯法無問題」、「俾人拉無所謂」嘅錯覺呢？用呢種方式默許違法行為，仲有道德底線嘅？

為何表揚不怕被捕不怕坐牢？

對於李怡文章嘅歪論，廣男就唔喺度逐樣講喇，依家先喺度原文照錄佢兩段文字，有關內文稱「但從6.12的行動來看，香港年輕人已到了無所畏懼的境界。他們不怕鎮壓，不怕流血，不怕坐牢，甚至不怕犧牲」、「有些人在6.12現場所見，年輕人對於被打傷、被捕，表現出『無所謂』的態度，仍然一往無前地、但同時也是有勇有謀有準備地抗爭。『時日曷喪，予及汝皆亡』，可以說是當今香港年輕抗爭者的悲壯心態。對他們來說，反送中這一役，可說是終極之戰」。廣男睇到呢兩段評論，第一個反應係，點解要凸顯年輕人唔怕坐監？俾人拉，會表現得「無所謂」嘅危險思想？

唔理李怡呢番說話，係真係「有些人現場所見」好，定係佢自己「吹」出嚟都好，佢講到啲後生仔受傷、被捕表現出「無所謂」嘅態度，係咩意思呢？係想講班年輕人為反修例，俾人拉都「無所謂」？定係都唔在乎自己前程，所以俾人拉都「無所謂」？另外，李怡肯定年輕人唔怕坐監？人哋啲仔女、子侄俾人拉，李怡就形容人哋俾人拉都「無所謂」，咁如果被捕嘅李怡嘅子侄，係咪又係俾人拉都「無所謂」呢？講真，呢啲說話唔會對社會氣氛有任何幫助，但就好可能會令到其他人誤以為俾人拉甚至坐監都「無咩大不了」；李怡先生，如果年輕人被捕，甚至被告「暴動罪」而罪成，可能要坐三、五年監兼前程盡毁，咩叫「無所謂」？！唔好玩啦！

不負責任的評論

李怡呢種將年輕人被捕及坐監講到輕描淡寫嘅做法，係極度不負責任，《生果報》作為媒體，李怡作為評論人、傳媒人，應該肩負起社會責任，話俾人聽何謂對、何謂錯，而唔係一味講抗爭，但唔講清楚俾人聽一旦違法會有咩後果！社會近期雞犬不寧，有人怪罪於政府工作做得唔好，但廣男就覺得，政客、個別媒體、評論員係咁有意無意散播叫人去「抗爭」的歪理，先係亂局無休止嘅最大元凶！