近期嘅社會亂象，令囍雨記起一齣電影，就係由郭富城扮演警隊一哥嘅電影《寒戰II》，郭富城喺戲入面有一段經典對白，大意就係法治精神係香港仍然繼續成為國際金融中心嘅重要基石，要時刻警剔警隊每一個決定，唔可以成為野心家嘅政治工具，希望每個人繼續捍衛一直堅信嘅價值觀。配合番近日民陣以至其他盲反派人士係咁要求政府、警方唔好告啲涉嫌犯法嘅示威者，呢段對白就更應境。講真，如果有人犯咗法但因為政治理由或者以各種方式脅逼警方就無事，咁以後無人需要守法，社會唔再需要法治啦！

難以接受的「叫價」

民陣將於聽日發起集會，繼續要求政府答應佢哋所謂嘅「五大訴求」，當中包括撤回「暴動」定性、釋放同不檢控6.12示威者等等。老實講，如果當日所有示威者都係和平示威，根本就唔會有暴力流血衝突發生，當時啲帶頭衝嘅示威者，衝擊、掟磚、掟鐵枝、掟鐵馬、放火、襲警等，令警察反擊，雙方都有人受傷，事後亦有唔少示威者被捕；如果因為示威者或者政客嘅施壓，而要唔追究、唔告涉事人，咁以後仲有法治可言？

盲反派政客要求唔告示威者，正正就如上面嘅電影對白所指，法治或者警隊唔可以成為野心家嘅政治工具。6.12衝突起源於示威者衝擊、襲警在先，就算佢哋有強烈嘅政治訴求，如果有人喺衝突中犯法，警察就要執法；其他人要評論時政，甚至要評論警方執法手段，呢啲係個人自由，但要求執法部門唔執法，檢控部門不檢控，明顯已經超出咗政治可以影響嘅範圍，因為執法部門要做嘢，檢控部門要獨立地作出檢控決定，從來都唔係由政客「說了算」！

暴動與否 法庭決定

至於啲政客要求政府撤回「暴動」定性，囍雨覺得可以分開為兩個問題，第一就係政府以至警方已經回應咗，所謂涉嫌「暴動」唔係指一般示威者，而係喺前線衝擊甚至襲警嘅示威者；第二就係即使呢班衝擊、襲警嘅人士被告，佢哋到底係咪真係「暴動」，都要由法庭審過、判過先知，而唔係由示威者去「定性」。當啲政客係咁叫人唔好告人、撤回「暴動」定性嘅時候，囍雨真係想講句，如果唔係有一班政客係咁煽動啲市民出嚟，撘好晒台叫人「預演」包圍立法會，又點會出現之後嘅暴力衝突呢？而家出咗事就要求政府唔好告人，合理咩？

原圖: RTHK及網上截圖