《逃犯條例》修訂風波愈演愈烈，多多少少都因為一班政客不斷到外國「告洋狀」，有論者認為呢單嘢好明顯有外國勢力介入，但盲反派政客就聲稱修例「關外國事」，所以外國「關注」好正常。廣男今日睇新聞，就見到「獨」派政客陳浩天話要組團去日本大阪集會、遊行，趁大阪本周舉行G20峰會，抗議中國咁話。廣男睇真啲，原來呢個遊行係由「自由印太聯盟」主辦，而呢個「聯盟」集合唔同地方嘅反華甚至「獨立」勢力，陳浩天同佢哋一齊去抗議、集會，係咪又想借機宣「獨」呢？

自由印太聯盟是甚麼？

《逃犯條例》風波餘波未了，陳浩天日前就喺社交媒體話要趁住G20峰會，「組團去大阪，難波站集會，心齋橋遊行」，話今次活動由「自由印太聯盟」主辦，自己被邀請去參與，話「活動」除咗香港人仲要日本政界、維吾爾人、台灣人等，稱「聯同受中國威脅同逼害嘅國家同民族，一齊向中國示威」云云。睇完呢個Post，大家覺得重點喺邊？重點就係「自由印太聯盟」呢個組織喇！

廣男翻查新聞資料，呢個簡稱為FIPA嘅「自由印太聯盟」大約喺舊年成立，由日、台、印、越、內蒙等地方「獨」派代表組成，聲稱要聯合周邊地區「圍堵中國」，例如當中嘅所謂「南蒙古」代表席海明，就曾經揚言主張內蒙「自決」、結束中國「喺內蒙古嘅殖民統治」；其他地方「代表」，亦大致有一個共同特徵，就係極度「反華」！

說到底 都是宣「獨」

呢排香港正因為《逃犯條例》修訂而處於國際「風眼」，陳浩天一個月前都曾經發聲質疑條例修訂，稱修例會令國際社會認為香港自由程度「更差」，依家佢借住大阪舉行G20峰會聯同其他「獨」派去集會、遊行，表面係抗議中國，客觀效果就係借機喺外國宣「獨」。大家必須睇清楚，對於某啲政客，尤其係「獨」派政客而言，無論講到咩議題都好，佢哋去到最後都係宣「獨」。

近日廣男睇網上輿論，有人建議香港班政客或者示威者應該襯G20峰會前「做啲嘢」，等國際社會繼續「關注」香港；廣男就覺得，當一班人或者政客「樂此不疲」地喺外國面前唱衰香港或者中央政府時，呢班人點睇都似係想害香港多啲囉！

原圖: 文匯報