因修訂《逃犯條例》所引發嘅社會對立氣氛，仍未見平復。今日喺灣仔警察總部外，又再度上演「千人圍警總」，囍雨執筆之時，現場示威者嘅情緒仍然相當高漲，毫無退讓之意。囍雨覺得，市民要表達訴求，冇問題；要集會示威，亦都好難阻止，但依家發動咁多人去包圍警察總部，意欲何為呢？係想要警方「跪低」？抑或唔再需要警察，要佢哋統統冇得返工、或者「放假」？大家係咪應該諗下，如果無咗警隊維持治安、守護法紀，我哋嘅社會又會變成點？如果有不法之徒趁火打劫，而威脅到其他市民嘅財產以至生命安全，係咪大家想見到嘅情況先？

今日朝早，大批市民響應學界及網民呼籲，去到立法會示威區外集會，示威者其後進一步佔據夏慤道，癱瘓交通；接近中午，香港眾志秘書長黃之鋒發動大批示威者包圍灣仔警察總部，大批市民企滿警總正門嘅軍器廠街、以及附近嘅駱克道、謝斐道行車天橋，不時高叫「撤回惡法」、「黑警濫權」、「放人」等口號，並表達要求同警務處處長對話、「撤回暴動定性」等訴求。雖然現場大致和平，但亦有少數人做出過激行為，包括架起鐵馬陣、堵塞同封鎖各個出入口、向警員掟雞蛋、以粗言穢語進行挑釁，甚至包圍警車；根據網上流傳嘅片段，個別示威者似乎已經準備好「做嘢」，有啲人開始分派雨傘，有啲就用保鮮紙包住身體（相信係為咗防範胡椒噴霧等），擺出一副戰鬥格，隨住下班時間後會更多人聚集，今晚可能又會發生暴力衝突！

九九九求助受影響

囍雨覺得，有訴求、有不滿都可以理解，但下下包圍呢度、堵塞果度，絕對唔係可以接受嘅做法，唔單止好多返工放工嘅市民大受影響，亦都絲毫無助於解決問題，只會不斷加深對立情緒。事實上，喺之前嘅幾次警民衝突入面，有人以自製武器襲警、掀起暴力衝擊，已經係過嗮火；之後，又有人煽動針對警察家人、仔女嘅欺凌，就更加過分。囍雨想講，如果話之前嘅種種過激行為，係挑戰緊香港法治，今日大舉包圍警總嘅行動，就更加係視法治如無物。大家係咪應該換位思考、諗一諗，警察作為執法者，有佢哋必須履行嘅職務，當佢哋成為政治爭拗嘅磨心而士氣大受打擊，甚至唔再執法，社會治安又會亂成點呢？當部分示威者當警察係「敵人」嘅時候，係咪香港已經唔需要警察執法、維持治安先？有時囍雨真係會諗，如果警察罷工或者放假一日，唔知香港會變成點呢？其實示威者今日嘅行動，至下午為止灣仔分區已經有43宗九九九九求助未能即時處理，明顯影響到緊急服務。

盲反派政客身影處處

值得留意嘅係，綜觀唔同新聞同網絡片段，現場已經有唔少政客「潛伏其中」，包括民主黨立法會議員林卓廷、公民黨立法會議員譚文豪、港島區立法會議員區諾軒以及工黨立法會議員張超雄等，佢哋當中有啲人送水又「視察」，究竟有何居心，真係得佢哋自己知，但如果之後真係衝突再起、甚至有人流血受傷，到時真係「大家都輸」！囍雨喺度再講一次，香港市民生命及財產安全，係依靠警務人員去守護，大家唔好成日當佢哋係敵人。

原圖：網絡