經過6.9、6.12嘅暴力衝突，有盲反派人士認為佢地嘅「違法達義」抗爭再次「遍地開花」，甚至連聲稱「和理非」、有水抽就抽嘅民主黨立法會議員林卓廷，都話反政府陣營「贏緊5比0」；廣男今日睇新聞，見到「違法達義」始作俑者戴耀廷就算「人在獄中」，都不忘寫文抽水兼「讚自己」，話自從佢喺2013年提出「佔中」概念後，呢種意念已經「突破原先嘅框框」云云。廣男就覺得，而家香港畀啲政客搞到咁亂，大家都知道源起於戴耀廷成日「教人犯法」、無法無天，佢仲好意思喺度「抽水」，係咪想其他人「認同」佢，「知道」所有衰嘢都因佢而起呢？

人在獄中 不忘「抽水」？

由於搞違法「佔中」罪成，戴耀廷個人而家仲坐緊監，但佢似乎依然非常關心社會，尤其係「違法達義」嘅「實踐」情況，喺《生果報》寫文話自己提出「佔中」後，經過幾年「演變」，呢種意念已經突破框框，仲話「佔領」已經成為香港抗爭嘅主導思想；仲話如果唔識疏導，更短時間內會有更猛烈「抗爭運動」，之後就拉到「民主制度」嚟講，話帶來「制度嘅根本改變」，喺未來嘅嚴峻挑戰。

廣男就覺得，戴耀廷呢篇文，簡單而言有三大訊息。第一，佢想話俾人聽，呢種「違法達義」歪風，係因佢而起嘅，而家「佔領」思潮成為盲反派嘅主流思想，都係多得佢，所以大家唔好忘記佢；第二，就係想「警告」政府，如果唔順應抗爭者訴求，小心會有更大型嘅抗爭行動；第三，亦都係最重要一點，佢所謂要「帶來制度嘅根本改變」，簡單嚟講就係想「策反」、顛覆香港甚至中央政府！

借機挑火頭

如果單單睇要「帶來制度嘅根本改變」，看似平平無奇，但只要綜合埋戴耀廷以往講過同寫過嘅嘢，大家就會明佢想講咩。之前戴耀廷去台灣出席所謂嘅「五獨」論壇，提到如果中國出狀況，香港到時就有唔同選項，包括考慮成為「獨立國家」，當時佢咁講已經俾人鬧到飛起；之後戴耀廷開始喺《生果報》係咁寫文，探討「港獨」可能性，唔少大意都係話等中國「出狀況」，香港就「有機會」喇。所以，當戴耀廷有意無意地話會有更大型抗爭、制度會根本改變嘅時候，廣男會解讀為，佢係想香港「亂上加亂」！

老實講，當一個煽動他人犯法嘅人，到而家仲好似想出嚟「領功」咁款，大家話盲反派班政客，到底係咩心態；係真心為香港好，定係想令香港更亂？