近來香港社會似乎瀰漫住一股前所未有嘅「仇警」情緒。一班盲反派政客和少數激進嘅市民，除咗針對修訂《逃犯條例》和政府之外，另一矛頭直指警方，無限放大甚至無理抹黑警員處理暴力衝擊嘅手法，有激進網民就喺網上煽動針對警察家人、仔女嘅欺凌，甚至連有啲老師、醫護人員亦都「響應號召」，加入仇視警察嘅行列。囍雨覺得，隨著修例爭議告一段落，大家係咪應該停一停、諗一諗，如果繼續盲從一班盲反派政客同激進網民嘅說辭，去製造對立、令仇恨嘅「雪球」不斷越滾越大，呢個係咪我哋所希望見到嘅社會環境？對盡忠職守嘅香港警隊又係咪公道？

不應成為政治磨心

呢幾日，盲反派繼續大力抨擊警方喺衝突中使用過分武力，建制派亦指出部分示威者有掟磚掟鐵枝，雙方爭拗已變成各自表述，但最不該嘅係，有人喺網上發起「杯葛、排擠警察子女」行動，煽動學生以至老師「在學校對抗警察子女」、揚言「禍必及妻兒」。呢啲經過「精心包裝」嘅故事，通過傳媒、網絡傳播開去，無可避免地，有人深深相信了。囍雨請大家諗一諗，如果任由呢啲「故事」無限延伸，只會令憎恨嘅情緒不斷擴張，一旦日後再出現警民對立嘅場面，勢必引發暴力程度更加激烈嘅「抗爭」；而警方基於履行職責嘅需要，又必然使用更加強硬嘅執法手段……若真陷入如此惡性循環嘅漩渦，香港社會又豈有寧日？

囍雨喺度想提醒大家，喺之前嘅幾次警民衝突入面，有人煽動「以武制暴」、散播《襲擊指南》係事實；有人以鐵枝、利器、磚塊甚至縱火襲警，亦都係事實，當呢啲行為由最初嘅「揚言」逐漸付諸實施、變成事實，即係話，有班人一早已經將警察放喺「敵對面」，同時亦等於將自己擺喺法治嘅「對立面」。當警察以專業、中立嘅態度維護法紀、制止犯罪時，囍雨覺得，唔應該令佢哋變成政治事件嘅磨心，更加唔應該令佢哋遭受「禍必及妻兒」嘅恐懼。

警察不是「敵人」

當然，對於警方執法過程中嘅手法，以至日常嘅訓練，囍雨相信有改善、提升嘅空間，尤其喺電光火石間所作嘅決定，「妥與不妥」，都可成為日後反思、檢討嘅案例。只不過，當有人不斷指責警察嘅同時，囍雨亦都想講一句，大家係咪應該以一個易地而處、客觀、理性嘅角度，去體量警隊嘅工作呢？香港之所以成為世界最安全嘅城市之一，警隊絕對功不可沒。大家不妨撥開紛爭，用心去睇一睇，全港三萬幾名守護市民生命及財產安全嘅警務人員，唔係我哋敵人。

原圖：文匯