政府推動修訂《逃犯條例》引起嘅社會矛盾及紛亂，未見緩和，部分激進反對派，堅持敵對態度，喺網上繼續散播仇恨言論，有人近日喺討論區發文煽動，以校園欺凌、杯葛、排擠警察子女作為抗爭手段，報復警員以「暴力」對待示威者。廣男認為，呢種極端仇警言論已經過晒火，校園欺凌絕對唔可以接受，仲要將仇恨帶入校園、灌輸畀下一代，為咗宣洩個人情緒，甚至要用暴力欺凌無辜嘅人？夠喇，收手啦！

有激進網民喺高登討論區發貼，發佈極端仇警言論，指「給有子女的警察傳遞明確信息，禍必及妻兒」，發起校園欺凌警察子女嘅行動，引起網民之間嘅熱烈討論，有人覺得言論過分激進，但係貼文者仍然堅持立場，更宣稱要用恐懼制止警方「過分使用暴力」；其實之前已經有網民對警員「起底」，喺網上公開警員家人嘅資料，煽動網民作出騷擾行動。

恐嚇警員　散播白色恐怖

俗語都有講，禍不及妻兒，如果網民唔滿意警方嘅行動，可以透過現有嘅機制去投訴、追討，警員嘅家人妻兒都係無辜嘅一群，做咩要搞佢地先？發佈呢種仇恨、甚至傷害他人嘅言論，散佈恐懼、製造「白色恐怖」，仲想利用小朋友作為抗爭「工具」？呢種做法已經係失去理智，到底有無搞錯啊！呢一班即用言論暴力嘅網民，擺明係煽動其他人欺凌？社會絕對唔應該容忍同姑息，廣男勸籲呢一班網民，教唆欺凌嘅行為，在情在理都講唔通，只會製造更多矛盾，所以喺做任何事之前，請停一停，諗一諗！

放下對立　彼此體諒

果班發表仇警言論嘅網民，應該設身處地諗吓，假如自己家人被威脅、被針對，感覺一定唔好受，所以請大家互相尊重，唔好再針對警察同佢哋家人！將社會推向互相對立、敵視嘅局面，講真對邊個都無好處。而家社會最需要嘅，係大家盡快放低歧見，唔好再出現爭執甚至衝突，否則再有悲劇發生，就追悔莫及。

原圖: 網上截圖及RTHK